跳飛機

  想搵第二個意思嘅話，請睇跳飛機 (搞清楚)。

跳飛機（英文：Hopscotch）係一種細路遊戲，玩家喺地上畫個飛機形狀嘅圖，跟玩法喺上面跳。個圖形通常似雙翼式飛機，所以咁叫。圖形分開好多格（通常有九格），每一格有一個冧巴。

香港嘅跳飛機

跳飛機最早喺羅馬帝國統治時期嘅英國出現，用嚟訓練羅馬兵，羅馬兵要着晒成套好重嘅盔甲嚟跳，練平衡、步法。之後啲羅馬兵嘅仔仔女女有樣學樣，呢個遊戲傳遍歐洲。

跳飛機喺1950年代至1980年代嘅香港相當流行，當時香港幾乎所有兒童遊樂場同小學操場都會有跳飛機嘅位。就算空地一塊，只要有一支粉筆或樹枝，細路響地上畫「跳飛機」嘅九個格，然後一齊玩。隨著香港經濟發展同娛樂方式嘅改變，跳飛機呢個遊戲經已息微喇。

玩法

英倫嘅跳飛機，連埋歌仔。

玩法每處地方都有啲分別，下面係香港嘅玩法：

1. 遊戲通常由第一格開始。
2. 玩家首先拋一條手鏈（或重嘅嘢）入第一格，然後扐起。
3. 之後，拋手鏈入第二同三格，然後雙腳跳入第一格，然後順序到手鏈之前嘅一格，執起手鏈。
4. 第四、五格同第七、八格係一對並排嘅飛機翼。執起喺第六格或第九格嘅手鏈時，雙腳分開企響呢兩格之內。
5. 到執第九格時，雙腳一齊踩第七第八格之後，要跳起轉身背著第九格，然後伸手摸手鏈，摸倒扐起，跳返起點。
6. 如果玩家做錯上面嘅程序、掟唔中、拋出界、失去平衡，都算輸。論到下一位玩家，輸咗，再到下一位。返到第一位時，由上次失手嘅地方再開始。

變化

跳飛機唔限於飛機形，重有好多唔同款。有格仔形，有蛇形，好多唔同款。

出面網頁

• Hopscotch