近衛家
近衛家（日文：このえけ，日本舊體：近衞家），係日本五大攝家之一，個名嚟自平安京嘅近衛大路，原本叫陽明家。祖先係藤原氏嘅分支藤原北家，初代當主係藤原忠通庶長仔近衛基實。
歷史
編輯近衛家大約響1153年左右由藤原忠通四仔（實際上係庶長仔）基實創立，嗰時叫陽明家。1163年，基實早死，大仔基通繼承陽明家，後嚟基通跟據響屋企前面嘅近衛大路，改名叫近衛家。之後基通一直同叔叔九條兼實（另一攝家九條家當主）響度對抗，而呢個時候近衛家就升為攝家之一。
鐮倉時代中期，第三任當主家實嘅細仔兼平另起鷹司家，而鷹司家後嚟都做咗攝家之一。
之後傳到第十七任當主前久，前久好做得，好快就得到當時好有勢力嘅豐臣秀吉睇起，令到近衛家地位上升。但之後一任當主信尹冇仔（得一個女太郎姬），前久又淨係得信尹一個仔，所以近衛家面臨畀人廢除。而前久有一個女前子，嫁咗畀後陽成天皇，生咗四個仔，所以信尹就認咗前子嘅第二個仔信尋做契仔去避免畀人廢除，從此近衛家就成為皇別攝家（即係指有皇室血統嘅攝家），所以得到嘅俸錄都特別多。
1884年，明治天皇頒令華族令，要求全部堂上家（即貴族，指一啲可以做好多高官職嘅家族）都要做華族，其中時任當主篤麿畀人封為公爵。而佢響政治界好活躍，曾經做過貴族院議長，而大仔文麿仲曾經做過日本首相。另外篤麿個二仔秀麿就做咗指揮家，而秀麿就影響咗依家近衛家好多成員都係玩音樂。
1947年，駐日盟軍總司令指示廢除華族令，近衛家都唔例外。雖然近衛家保住咗銜頭，但所有官位冇嗮。
之後文麿傳位畀文隆，文隆雖然有個仔隆明，但隆明係響文隆同老婆正子離婚之後先至出世，所以唔計佢；而秀麿個大仔秀健係私生仔，文隆唔想傳畀佢。最後佢認咗外甥、細妹溫子二仔忠煇做契仔。而現任當主就係忠煇。
歷任當主
編輯| 名 | 關係 | 註 | |
|---|---|---|---|
| １ | 近衛基實 | 藤原忠通四仔 | 名義上係忠通四仔，實際上係佢嘅庶長仔 |
| ２ | 近衛基通 | 基實大仔 | |
| ３ | 近衛家實 | 基通大仔 | |
| ４ | 近衛兼經 | 家實三仔（嫡長子） | |
| ５ | 近衛基平 | 兼經大仔 | |
| ６ | 近衛家基 | 基平大仔 | |
| ７ | 近衛家平 | 家基大仔 | |
| ８ | 近衛基忠 | 家平獨仔 | |
| ９ | 近衛經平 | 家基細仔 | |
| １０ | 近衛道嗣 | 基嗣庶仔、經平長孫 | |
| １１ | 近衛兼嗣 | 道嗣大仔 | |
| １２ | 近衛忠嗣 | 兼嗣大仔 | |
| １３ | 近衛房嗣 | 忠嗣大仔 | |
| １４ | 近衛政家 | 房嗣二仔，教基個細佬 | 因嫡長子教基早死又冇仔，先傳畀佢 |
| １５ | 近衛尚通 | 政家大仔 | |
| １６ | 近衛稙家 | 尚通大仔 | |
| １７ | 近衛前久 | 稙家二仔（嫡長子） | |
| １８ | 近衛信尹 | 前久獨仔 | |
| １９ | 近衛信尋 | 後陽成天皇二仔、信尹契仔 | 阿媽前子係信尹個細妹，即佢係信尹個外甥 |
| ２０ | 近衛尚嗣 | 信尋大仔 | |
| ２１ | 近衛基熙 | 尚嗣大仔 | |
| ２２ | 近衛家熙 | 基熙大仔 | |
| ２３ | 近衛家久 | 家熙大仔 | |
| ２４ | 近衛內前 | 家久大仔 | |
| ２５ | 近衛經熙 | 內前大仔 | |
| ２６ | 近衛基前 | 經熙獨仔 | |
| ２７ | 近衛忠熙 | 基前獨仔 | |
| ２８ | 近衛篤麿 | 忠房大仔、忠熙長孫 | |
| ２９ | 近衛文麿 | 篤麿大仔 | 同時係第34、38同39任日本首相 |
| ３０ | 近衛文隆 | 文麿大仔 | |
| ３１（現任） | 近衛忠煇 | 細川護貞個仔、文隆契仔 | 阿媽溫子係文隆嘅二妹，即佢係文隆嘅外甥 |