迪禎黃公祠

迪禎黃公祠喺香港新界北區沙頭角山咀92號，相傳大概喺1905-1921年起，用山咀黃氏其中一房嘅開基祖黃迪禎個名命名。黃迪禎嘅後代喺1820年代，喺沙頭角建立咗東和墟。黃氏族人係1850年代中移民去巴拿馬，祠堂壁畫嘅飛船、汽球同飛機雕塑亦反映咗呢段歷史。每到農曆新年，黃氏都會齊集祠堂祭祖同設宴。隨住族人逐漸移居去英國，黃氏近年都已經暫停咗點燈儀式。迪禎黃公祠喺2011年6月24號被評為香港三級歷史建築。