透雕龍鳳紋銅鋪首
透雕龍鳳紋銅鋪首係一件喺1966年河北省易縣出土嘅戰國時期古董，現存喺河北博物院。
透雕龍鳳紋銅鋪首高74.5釐米，闊36.8釐米，重21.5公斤，上面有一隻饕餮嘅獸面，個口叼住一個八稜形嘅環，額頭上重企咗隻展翅鳳凰，鳳凰對爪捉住一條蛇，鋪首兩邊各有一條向上攀爬嘅龍，虎視眈眈望住下方。佢雕工精細，栩栩如生，氣勢非凡，包含有浮雕、透雕、鑄接、焊接嘅工藝细節，係一件難得一見嘅古工藝品。
鋪首係中國古代器物上嘅附件，有分金鋪或者銅鋪，唔一定係銜環，其他青銅器都會有鋪首，直到唐代先至出現鋪首同銜環兩個概念，再到明代就開始有鋪首銜環嘅叫法。由於係喺戰國時期燕國都城燕下都城外最北端嘅老姆台宫殿建築基址出土，出土現場重有好多建筑材料嘅碎片，例如係板瓦、筒瓦同半圓形瓦當咁，所以有理由相信透雕龍鳳紋銅鋪首係宮殿大門上嘅門環。