進擊吧，少女！
《進擊吧，少女！》（粵拼：zeon3 gik1 baa6 siu3 neoi5，簡化字：进击吧，少女！，英文：Goal! Girls），係2018年中國網絡電影，陳小桃執導，李莎旻子、李祥祥領銜主演，北京華誠傳媒、上海騰訊企鵝影視、映美傳媒、悅多文化傳媒（北京）有限公司出品。呢齣戲以校園體育運動做題材[1]，講排球少女齊可燃幫一支就來解散咁滯嘅球隊翻生。2017年4月23號喺杭州開拍[2]，5月5號殺青，2018年6月8號上晝10點喺騰訊視頻首播。
| 進擊吧，少女！ Goal! Girls | |
|---|---|
 正式海報 | |
| 資料明細 | |
| 導演 | 陳小桃 |
| 編劇 | 章文佳 |
| 主演 | 李莎旻子、 |
| 主題曲 | 李莎旻子《小蝦》 |
| 製片商 | 北京華誠傳媒有限公司 上海騰訊企鵝影視文化傳播有限公司 映美傳世（北京）文化傳媒有限公司 悅多文化傳媒（北京）有限公司 |
| 片長 | 80分鐘 |
| 產地 |  中國 |
| 話 | 國語 |
| 上畫同發行 | |
| 上畫日期 | 2018年6月8號（中國大陸） |
| 公映許可 | 電審故字[2018]第225號 |
劇情
編輯生於排球世家嘅天才少女齊可燃（李莎旻子飾），自細受阿媽嘅薰陶，鍾意打排球，立志做排球員。但係可燃阿媽喺一次排球比賽心臟病死咗，所以阿爸好早就反對可燃打排球。可燃初初讀大學，偷偷地報名參加咗大學嘅排球隊，不過基礎太差差啲入唔到。
陵川隊戰績一直都水皮，學校又不斷施壓，令球隊就來解散。喺練習賽輸畀銘傳隊之後，陵川隊長鍾若珊（高藝蝶飾）向教務主任承諾，若果全國聯賽冇好成績就解散球隊。可燃嘅出現，令原本人心渙散嘅排球隊慢慢團結，班隊員互相鼓舞，每個人練成自己嘅必殺技。可燃嘅球技亦迅速提升。
全國聯賽正式開鑼。陵川隊2:0輕鬆淘汰櫻蘭隊，但係慶功宴過後未能及時返回寢室，觸犯校規，俾校方再次施壓。教務主任向若珊最後通牒，聯賽入唔到三甲就解散球隊。一直瞞住阿爸偷偷打波嘅可燃亦因呢件事穿煲，令阿爸好嬲。淘汰賽第二輪，陵川隊面對德化隊。可燃狀態唔好頻頻失誤，若珊將可燃換走，卒之都係能夠2:0贏波。可燃逐漸明白團隊精神好緊要。
之後陵川隊贏咗樓芝隊，晉級四強。可燃獲得阿爸認可。之不過喺呢場比賽臨尾，可燃意外受傷，輕微骨裂。醫生建議可燃三個月內避免任何劇烈運動。可燃難免失落。
準決賽，陵川隊再次同銘傳隊交鋒，先輸一局。可燃帶傷上陣，將局分扳成1:1。第三局，銘傳隊派出王牌選手川奈亞（崔龍珠飾），雙方交鋒激烈，一時難分勝負。銘傳隊攞到賽點，但可燃嘅扣殺將比分扳平，而可燃亦再次受傷。最後一球，受傷嘅可燃接球失誤，卒之陵川隊細分24:25輸第三局，局分1:2輸波，四強止步，球隊俾學校解散。
經過全校學生聯名請願保留球隊，教務主任終於鬆口，球隊有得留低。
卡士
編輯主演
編輯| 演員 | 角色 | 配音 | 介紹 |
| 李莎旻子 | 齊可燃 | 唔適用 | 陵川隊新人，技能係「雷霆萬鈞」 |
| 李祥祥 | 馮飛 | 唔適用 | 陵川隊主教練 |
| 高藝蝶 | 鍾若姍 | 鄭言 | 陵川隊隊長，技能係「流光幻影」 |
| 毛娜 | 王佳佳 | 唔適用 | 陵川隊新人，技能係「魚躍龍門」 |
| 王蒴 | 李曼妮 | 劉晴 | 陵川隊二傳手，技能係「荷魯斯之眼」 |
其他演員
編輯| 演員 | 角色 | 配音 | 介紹 |
| 汪安琪 | 琴美 | 姻子 | 陵川隊主力 |
| 李玉琪 | 夏娜 | 萬純 | 陵川隊主力 |
| 崔龍珠 | 川奈亞 | 姻子 | 銘傳隊王牌，技能係「電光火石」 |
| 岳暉 | 教務主任 | 王勇剛 | 陵川學院教務主任 |
| 王子 | 馮聰 | 苗壯 | 馮飛阿爸 |
| 李敬輝 | 齊可燃阿爸 | 高旭東 |
幕後
編輯- 導演：陳小桃
- 編劇：章文佳
- 剪輯：張銳利、鄭然
- 出品人：孫忠懷、劉長江、吳延、王翰濤[a]
- 總監製：劉榮
- 總策劃：常斌、張余、壽建鋒
- 策劃：姚玲、付娟、鄒通、王曉娟、劉依、余蛟雨、李珂、王娟、曾昭楊
- 總製片人：劉瀧、壽建鋒
- 製片人：李娜、高晗、李昊洺
- 執行製片人：岳暉、李熒熒
- 製片主任：王子
- 執行製片：郭哲君、丁雪峰、金禹萱、任少宸
- 後期導演：陳明俊
註
編輯- ↑ 片頭字幕係「王曉濤」。
參考
編輯- ↑ 〈燃燒了青春！《進擊吧，少女！》引發熱議〉。《網易娛樂》。2018-06-04。喺2018-06-07搵到。
- ↑ 〈青春競技系列網大首部《進擊吧！少女》今開機〉。《騰訊娛樂》。2017-04-24。原著喺2018-06-12歸檔。喺2018-06-07搵到。
出面網頁
編輯- 進擊吧，少女！嘅新浪微博
- 《進擊吧，少女！》喺豆瓣嘅資料（大陸簡體）