遊戲史

遊戲史（history of games）係指遊戲嘅歷史。

一個山窿入面嘅遠古壁畫（公元前 6,000 年）描述一班人喺度玩鬥游水。

廿世紀之前

廿世紀之前嘅遊戲主要以「平民過程」（folk process）產生嘅：遊戲呢家嘢喺人類文明誕生之前經已存在，而今日好多廣受人愛戴嘅遊戲，例如係西洋棋、圍棋、蔴雀、百家樂棋、印度十字棋、同寶石棋等，閒閒地都有過千年歷史（當中圍棋可以追溯到公元前嘅時代）；但係古時並冇遊戲設計師呢個職業，所以一隻遊戲嘅演進過程通常係噉－某一個族群嘅人諗到隻遊戲出嚟，跟住呢班人喺佢哋玩吓玩吓，慢慢噉視乎隻遊戲玩起上嚟點修改隻遊戲嘅規則（就係所謂嘅「平民過程」），跟住隻遊戲因為受歡迎而廣傳，最後有人覺得想制定一套標準規則，等唔同地方嘅人可以互相較量；例如係西洋棋噉，呢隻遊戲可以追溯到去成公元 600 年之前嘅印度，但喺打後嗰 1,000 年之內，西洋棋都係由唔同地方嘅人各自玩，各有自己嘅規則，要去到成 15 世紀，先有人開始傾要標準化西洋棋規則同埋搞大型國際比賽。

新媒體時代

現代嘅遊戲設計喺 19 世紀後期起動。當時嘅社會喺經濟同科技方面大躍進，有咗攞遊戲嚟賣嘅風潮，而好多本嚟係靠平民過程演化嘅遊戲變成咗商品，有出版商為佢哋整棋盤或者棋，令到整遊戲開始變成一種喺商業上重要嘅活動；而且當時印刷技術開始蓬勃，令到圖板同紙牌遊戲可以大規模噉量產攞嚟賣，並且俾啲市民大眾買返屋企嗰度同屋企人朋友玩。

打後廿世紀中期又產生一個革命性嘅巨變：個人電腦嘅誕生造就電子遊戲出現，有人就嘗試將啲已經受愛戴嘅遊戲電子化（例子有乓，pong），跟住整電子遊戲嘅人仲開始探索電子遊戲嘅極限，整一啲淨係用電子媒介先至玩到嘅遊戲類型，例如射擊遊戲呀噉。到咗廿一世紀，遊戲業發展得好勁，令遊戲成為咗極高人氣嘅消閒活動－據估計，2018 年電子遊戲產業淨係喺美國經已有成 434 億美元嘅銷售量（仲勁過電影業），而遊戲設計自自然然就成為咗一門有影響力嘅領域，好多大學同技術學院都開班教遊戲設計相關嘅知識同技能。

睇埋

• 遊戲設計
• 模因