道德兩難

道德兩難（英文：moral dilemma），又或者叫倫理兩難（ethical dilemma），係指倫理學同道德心理學等領域上成日討論嘅一啲情境，涉及一個人要做一啲決策，但無論佢揀邊一個都好，都會犯某啲道德上嘅規範。

舉個簡單例子說明，想像以下噉嘅情況：主角見到有架火車喺度全速衝緊向 5 個人嗰度，會撞死佢哋；不過，主角有能力令架火車轉去第條路軌嗰度，噉做會救到嗰 5 個人，但喺另外一條路軌上面又咁啱得咁橋有個人喺度，所以火車轉向嘅話，嗰個人會俾火車撞死；因為時間限制等嘅原因，主角淨係得兩個選擇－

1. 睇住嗰 5 個人死（犯咗「要幫助有需要嘅人」呢條道德規範），或者
2. 郁手令架火車轉向（犯咗「唔好做啲會傷害其他人嘅行動」呢條道德規範），

喺個故仔入面，無論主角點揀，佢都會犯咗某啲道德規範，所以算係「陷入兩難」。