邊葉

邊葉（limbic lobe）係哺乳類動物兩邊腦半球內側表面嘅弧狀區域，一般包括咗海馬體（hippocampus）、扣帶皮層（cingulate gyrus）、同海馬旁回（parahippocampal gyrus）等嘅結構。邊葉同額葉之間嗰條邊界係帶狀溝（cingulate sulcus），同頂葉之間嗰條邊界係頭頂下溝（subparietal sulcus）。

將個腦劏開嘅想像圖；紫色嗰橛係邊葉，位於大腦皮層下面。

邊葉嘅結構一般都同情緒好有啦掕，例如係海馬體前部噉，有研究發現，海馬體前部（anterior hippocampus）入面嘅兩個部份－CA1 同 CA3－分別喺衝突處理上扮演咗唔同角色：「有衝突性嘅刺激」係指一啲同時係獎賞性又係懲罰性嘅刺激，例如係一笪可能有嘢食又有可能有獵食者嘅地方，呢類刺激通常會令隻動物又想避開又想靠近，並且會令隻動物覺得焦慮；壓抑 CA1 嘅活動會令到隻動物傾向避開有衝突性嘅刺激，而壓抑 CA3 嘅活動會令隻動物傾向靠近個刺激。