都會城

  想搵架空列車車站嘅話，請睇都會城站。

  想搵位於爾一區嗰座大商場嘅話，請睇都會城商場 (本拿比)。

  提示：呢篇文講嘅唔係東薈城。

都會城（英文：Metrotown，常見誤譯有「鐵道鎮」等）位於加拿大卑詩省本拿比西南部，係本拿比嘅四個正式嘅市鎮中心之一，亦係大溫哥華地區嘅幾個區域性市鎮中心之一。根據本拿比市政府嘅官方定義，鐵道鎮嘅界線分別係：西邊嘅市界路（Boundary Road；本拿比同溫哥華嘅市界、南邊嘅帝國街（Imperial Street），東邊嘅皇家橡園道（Royal Oak Avenue），北邊嘅京士威道（Kingsway）以北嘅一系列細街道。總面積為2.97平方公里。

從布勒內灣遠望都會城

名稱來源

英文名

美國城市議題及經濟學學者R·W·亞查（R. W. Archer）話：「metrotown」爾個詞（直譯「都會鎮」）係喺1962年由美國巴爾的摩地區規劃委員會（Baltimore Regional Planning Council）第一次使用嘅。委員會曾經倡議喺巴爾的摩市外圍設立一系列建築密度高過當時市郊地帶建築密度嘅「都會鎮」，每個「都會鎮」足以容納10萬至20萬名居民。1969年，R·W·亞查喺《美國經濟學及社會學期刊》上面發表文章，借用「metrotown」爾個詞來描述一種新市鎮：爾種新市鎮擁有一系列唔同嘅土地用途，以照顧區内居民就業同起居上面嘅需求，同時又要同都會區内其他社區相輔相承。佢又認為：喺一個都會區内興建一系列互相連接嘅都會鎮，係最合乎成本效益嘅新市鎮開發模式，重列舉瑞典斯德哥爾摩外圍的韋靈比（Vällingby）同許格達倫（Högdalen）為爾種發展模式嘅範例。本拿比政府喺1970年代採納「metrotown」爾個詞來泛指爾種市鎮中心發展模式，但係後來爾個詞逐漸演變成專指京士威道同修適士道（Sussex Avenue）交界一帶嘅專有名詞。

中文名

「Metrotown」爾個名出現嘅初期並無統一嘅中文譯名。喺1980年代末同1990年代初，「鐵道鎮」、「地鐵城」 同「美都鎮」 等譯名都有人過用。「鐵道鎮」同「地鐵城」都同鐵路運輸有關，因為「Metrotown」裡面嘅「Metro」喺英文裡面可以指「地鐵」。「鐵道鎮」後來逐漸成為大溫哥華地區中文媒體同華人機構最常用嘅譯名，但係宜家依然有部分媒體同機構（例如本拿比公共圖書館中文網站）將爾個地區稱為「都會城」。