金錢村土地神壇

金錢土地神壇（英語：Earth God Shrine of Kam Tsin），喺香港新界上水金錢村嘅北面，青山公路古洞段路邊，係一座較罕見嘅佔地超過100平方尺嘅大型土地神壇，大概有200年歷史，佢嘅來源相傳係清朝乾隆年間，金錢村有一名青年喺應考科舉前向村裏面嘅土地神祈求保佑，結果成功高中，之後就返鄉下起咗呢座土地神壇還願，神壇二百年嚟經過多次修葺，村民非常重視，政府喺1980年代起粉嶺公路時都曾經改變建設路線規劃以避免破壞神壇。由於日久失修，加上神壇旁邊嘅大榕樹樹根長到神壇上面，使到神壇長期承受榕樹嘅重量而出現裂縫，神壇頂部漆油亦有剝落現象，甚至有移位跡象，然而由於旁邊榕樹樹齡較高，政府決定修葺神壇過程中要連同榕樹一齊進行保育。喺2001年被評為一級歷史建築，2011年5月17號改評為香港二級歷史建築。