金門菜刀

金門菜刀（粵拼：gam1 mun4 coi3 dou1），係中華民國金門縣嘅特產之一，使用金門砲戰期間中國人民解放軍砲擊金門所用嘅砲彈嘅彈殼製造。金門菜刀好利，又好耐用。

史

睇埋：金門砲戰

金門菜刀嘅製造過程

1958年至1979年間，中國人民解放軍成日用榴彈同砲宣彈砲擊金門，響20年間有超過100萬粒砲彈落喺金門；解放軍喺砲擊前期用識爆炸嘅榴彈，後期用唔會爆炸嘅砲宣彈，呢兩種炸彈係製造金門菜刀嘅主要原料。

砲戰之後，「金合利鋼刀店」嘅老闆吳君乃買咗好多島內嘅彈殼，用嚟整刀。由於彈殼嘅鋼鐵嘅質量好好，打製出嚟嘅菜刀特別利兼耐用，即使切硬物都唔容易變形，令到金門菜刀喺台灣好出名。家陣整金門菜刀嘅著名鋼刀店有「金合利鋼刀店」同「金永利鋼刀店」；由於菜刀有紀念價值，早年去金門當兵嘅台灣後生仔返鄉下嗰時，通常會買幾把嚟留念；台灣海峽兩岸實施「小三通」之後，金門菜刀又成為大陸觀光客爭相搶購嘅產品。