銀河娛樂集團

  想搵第二個意思嘅話，請睇銀河 (搞清楚)。

銀河娛樂集團有限公司（港交所：00027）簡稱銀娛，喺澳門開賭場及酒店等——旗下成員有星際酒店、澳門銀河、澳門百老匯、城市娛樂會；又對蒙地卡羅濱海度假酒店集團作股權投資，並藉此撈到外國。其轄下之銀河娛樂場股份有限公司有個澳門嘅主賭牌。

是

隨住銀娛股價猛升，大老細呂志和身家暴漲，彭博億萬富豪指數更一度喺計錯數嘅狀態之下，顯示佢有錢過李嘉誠，做咗亞洲首富。

非

監控員工網上言論

响2018年6月22號，《東方日報》報道：
銀娛靠昇華在線有限公司，响兩個月前起，循各種途徑喺網上揾出並整走對銀娛不利嘅貼文，特別係監控員工喺社交媒體上面嘅留言，重要佢哋唱好公司。銀娛因此被投訴干涉員工私隱。銀娛辯稱，呢啲係該行業慣常嘅網上營銷手法，並响6月20號同傳媒講話噉樣做無違法，然而以保密協議為由唔披露詳情。有員工懷疑，公司想消除對於佢上年要員工喺颱風天鴿吹襲時返工嘅大量劣評，亦將呢件事同早前劍橋分析違規收集面書用戶資料相提並論，有個人私穩同言論自由遭侵犯嘅憂慮。

响2018年6月22號，香港個人資料私隱專員公署發新聞稿話：
有調查呢單嘢。

風災引爆勞資積怨

颱風天鴿响2017年8月23號吹襲澳門，搞到該城一片狼藉，有唔少自稱銀娛員工隨即喺互聯網寫嘢，向僱主抱怨，部分矛頭直指大股東呂志和家族。

响2017年8月24號，銀娛員工聯盟會發表標題為「銀河娛樂員工給良心顧主呂氏家族的一封信」嘅公開信，內容為：
佢哋真係好嬲；打完風之後，公司要求員工喺兩個鐘頭之內埋位開工，不過欠缺適當安排，極之混亂，場內冇供水兼冇冷氣……噉樣返工簡直係揾命搏……有人加班幾個鐘頭，又有人等車幾個鐘頭；因此遲到嘅，又被通知要扣人工……質問對方人性何在……其他博彩企業都有相應措施，偏偏呢檔冇……呼籲呂氏家族咪再只當旗下員工做賺錢工具，而應該採取更加人性化嘅處理方式……最近喺公司內部做過調查，發現居然有七成半人唔贊成政府畀該公司個賭牌續期，希望老闆自己去了解下箇中原因。

銀娛响2017年8月25號以新聞稿宣布，向所有營運員工發放1200澳門元颱風相關津貼，又將受颱風影響而响2017年8月23—25號嘅缺勤，通通當有薪假期，响同期返工唔準時嘅職員亦都唔使扣糧 ……為之前唔夠妥善嘅處理表示遺憾，已經制定特別措施支援員工首先處理屋企要事，鼓勵受影響者向部門主管匯報，等公司跟進同援助。傳媒指此舉係補鑊措施。

响2017年8月26號，有疑似銀娛員工，喺網上發帖，公開咗封該公司嘅內部衣貓，入面叫隊員「自願」去收拾公司嘅玩水設施——天浪淘園，以求盡快重開，重提醒要着運動裝、帶替換用衣物同防曬劑。嗰個發布者批評，該集團唔似多間其他公司，派人出動救災，而係叫職員做義工清理公司泳池，行為可恥，唔負社會責任，亦要求政府唔好畀銀娛個賭牌續期。其他網民亦紛紛和應。

响2017年8月27號，銀娛作出內部澄清：
負責開天浪淘園嘅人手唔夠，驚清理唔切該區俾風吹爛咗嘅植物同設施嘅話，到另一個颱風帕卡吹到嚟時，會好危險，因此至會鼓勵其他員工响開工時間過去幫手 。然而用詞不當，引起誤會，特此致歉。

銀娛人事部同三個員工代表約咗，响2017年8月30號去勞工事務局，準備喺該局人員在場嘅情況，討論勞方之前提出之福利同工作安排要求，然而資方話有突發災後事宜，趕住要去處理，放咗飛機，叫褪遲一日傾。响當日，有唔同工會嘅代表同唔止兩百個銀娛員工，由立法議員宋碧琪、高天賜同梁榮仔，及民眾建澳聯盟副主席陳德勝陪住，去到該局，投訴被公司剝削權益……又要求銀娛人事部嘅人即刻嚟傾；後者得悉後，由管理層代表赴會。銀娛員工聯盟會理事長呂毅偉及副理事長黃長源等人，提及資方之諸多唔妥，以及職員對佢哋嘅唔滿意。銀娛一方話會積極跟進員工嘅訴求，並樂意建立恆常之溝通機制，收集佢哋嘅意見。銀娛之後發出新聞稿，宣布提供「災後復修援助」、「嚴重損失援助」、「特別現金獎賞」及「特別股份獎賞」等支援；又推出新嘅颱風政策，包括增加某啲津貼。

响2017年9月4號，銀娛宣布，旗下員工可以得到相當於3個月工資嘅「特別股份獎賞」及最少有1.4個月工資咁多嘅花紅。

响2017年9月5號，新澳門博彩員工權益會同一班銀娛員工，喺澳門銀河附近遊行，該會理事長周銹芳表示，之所以發動遊行，係因為收到銀娛員工嘅求助——主要訴求包括：爭取出14個月糧、取消員工評分機制同飛牌制度，以及要求升職機制公平透明等；亦有員工批評，嗰年突然改咗制度——只係喺九月發放相等於七成半月薪嘅特別花紅，亦唔係個個都有份攞……新措施唔合理又唔公平，要求資方响一個禮拜之內回覆，否則或者罷工。治安警察局稱佢哋派咗大概廿人維持秩序，遊行者人數約為百五；遊行方則話佢哋有三百人到。銀娛指呢個係非銀娛員工組織嘅遊行，不予置評。

呂志和接受星島新聞集團專訪，解釋之前一連串勞資糾紛係誤會，又向員工表示感激，重講述為賑災所做之善事嘅詳情；報道由2017年9月5號起出街。

銀娛响2017年9月11號發出通告，宣布安排部分將會交畀員工嘅公司股份，提早發放。

拎

1. Galaxy Entertainment