鏡蓉書屋門前種咗一樖木芙蓉

鏡蓉書屋香港法定古蹟,曾經係禾坑村嘅書屋,即係大清時嘅學校。鏡蓉書屋響家下沙頭角軍地中間嘅上禾坑,即係沙頭角公路附近。而間屋就響上禾坑村最叾叾[1]。書屋經過1993年大修之後,就開放畀公眾參觀。

禾坑村係條客家村,族人姓李。呢族人比較注重讀書,所以就有書屋。而呢間書屋,估計係大清初年開嘅,初初係畀村裏面五到十人讀書嘅卜卜齋。去到乾隆帝做皇帝,即係乾隆年間(1736年到1795年),呢家屋曾經大修,一層變兩層。

載淳做皇帝,同治十一年(1872年),呢間又再整過。家下鏡蓉書屋四字大字,就係當時粉嶺一帶出名嘅學者李培元題嘅。家下學者相信鏡蓉書屋個名係呢個時定,雖然村民相信之前就有。李培元亦響書屋敎過好多年,佢個學李長春重拎到到廣州府學秀才第一名。

因為書屋出過好多秀才,所以好多其他地方嘅學生都來寄宿讀書,甚至遠到大埔沙田荃灣都有人來學。後尾時代變,間書屋變成鄉村小學,去到1986年夏天就執埋。

鏡蓉書屋因為咁有歷史價值,1991年4月就畀香港政府定做法定古蹟,受到《古物及古蹟條例》保護。1992至1993年畀古蹟古物辦事處建築署夾手叫本地公司執返靚,1993年中執好就開畀公眾參觀。

鏡蓉書屋個鏡蓉,學者摷到原來大唐時段成式筆記小說《酉陽雜俎》就有。個典故就講李固言落第,即係考試肥佬,就去四川行下。咁佢見到個阿婆,阿婆就同佢講,『郎君明年芙蓉鏡下及第』同『後二紀拜相』。李固言第二年再考,竟然咁橋個題目係《人鏡芙蓉》,而廿年後重做埋宰相。

而咁啱同治十年(1871年),間屋書大修前一年,粉嶺龍躍頭有個員生鄧蓉鏡,佢就響呢年考到進士,係呢帶二百年來第一個。所以,學者估計李培元題呢個名,係想學生好似李固言同鄧蓉鏡一樣讀到書,有功名。

鏡蓉書屋係兩層兩進嘅屋,係青磚砌成,長方形,中間有天井。正中係門廳,天井同正廳。除咗大門比較靚,其他都好平實。下面個廳係課室,側邊耳房係敎員室,而閣仔就畀學生住。房同房之間用泥磚夯土間。

參考

  • 鏡容書屋(小冊子). 康樂及文化事務署. 2003年3月. 

  1. 讀「督」。係同【𢽴】/【𢽚】同意

出面網頁