鑽油台

鑽油台（英文：oil platform），又叫海上鑽油台或者石油平台，係一個起喺水面以上，用嚟從水底提取石油嘅工程建設。有唔少鑽油台亦都有住人嘅地方，等喺鑽油台上面做嘢嘅工人有地方過夜。

有啲鑽油台係打樁釘死喺海底嘅，有啲就係浮喺水面嘅。仲有啲地方為咗起鑽油台而填海填咗個人工島出嚟擺個鑽油台。

起鑽油台嘅地方底下都係有岩層係有石油或者天然氣嘅。呢啲地方大部分都係海裡面，大陸架上面。

鑽油台下邊駁住油井，將油井入面嘅石油或者天然氣泵出嚟，然後用一啲好似臍帶咁嘅喉管運去陸地，最後送去用石油嘅地方。有啲大嘅鑽油台自己做埋煉油廠，將新鮮掘出嚟嘅石油提煉好先至泵去陸地。

鑽油台經常涉及環保爭議，因為燒化石燃料牽涉到氣候變化嘅問題，鑽油嘅過程又會影響油田附近嘅自然環境^[1]。最膾炙人口嘅例子係2010年墨西哥灣漏油事故，呢單嘢搞到墨西哥灣嚴重受污染，死咗好多海鳥、海魚等野生動物，令到公眾對石油開採業越嚟越反感。

參考