陳奕迅澳門演唱會事件

陳奕迅澳門演唱會事件係指香港歌手陳奕迅響2023年10月14號喺澳門金光綜藝館舉行緊《陳奕迅 FEAR AND DREAMS 世界巡迴演唱會》嗰陣發生嘅一單嘢。當其時喺演唱會嘅互動環節入面，陳奕迅講講下粵語，失驚無神有臺下觀眾大嗌叫佢「講國語」同埋「講普通話」，陳奕迅聽到之後吽嗮噉睥住觀眾席靜咗幾秒，跟住噏咗句泰文，然後又話「I love speaking whatever the way and language I want（我鍾意講乜就講乜）」，全場即時拍嗮手掌。佢之後再用普通話嚟話返嗰位觀眾轉頭，話「你可以講『麻煩你說國語（唔該你講國語）』噉就比較好聽啲，但你而家係（大大聲噉）『講國語！』。我唔係唔識講國語，我可以講國語，講得好流利都得，你可以要求『多謝、請、麻煩你』」，陳奕迅之後又轉用廣東話話「No no no, don’t get me wrong。有人如果話「Speak English!」我都會嗌佢「Shut up」，其實你聽唔明咪算囉」。跟住又話「即係David Bowie（大衛寶兒）喺度，唔通我又『講國語』呀？『講廣東話』咁呀？奇怪呀真係。我塞返耳塞算喇，我唔理你呀，你唔郁都得㗎，我就自己郁喇，Bye-bye」。

呢段對話畀人影低咗兼且蒲（po1）咗上唔同平臺，更加響微博度瘋傳，對於陳奕迅畀人命令講國語，好多網民都力撐佢，尤其係港澳地區同埋廣東廣西甚至海外講粵語嘅人，都覺得既然香港同澳門都係以講粵語為主嘅城市，噉佢身為香港歌手響澳門場講廣東話都極之合理，但同時亦有北方網民批評話佢唔講普通話即係唔愛國。

後續

10月19號，陳奕迅宣佈因為身體唔舒服，之後嘅澳門站演唱會要延期，畀外界估可能同呢單嘢有啦掕。

11月13號，陳奕迅響澳門威尼斯人酒店舉辦新專輯發布會，之後接受傳媒訪問、講返呢單嘢嗰陣，首度開腔回應，而且仲用先後用普通話同廣東話耍冧：「係我做得唔好嘅……應該做嘅嘢就係，演繹好首歌，我自己太執著啫，其實取決於我嘅心態，我覺得其實我做得唔啱，其實咪辜負咗啲觀眾，係我係我唔啱」。呢個舉動就畀人質疑可能係想氹返掂啲大陸觀眾唔好倒自己米。

類似事件

喺呢單嘢響網上揚咗之後，再有唔同嘅香港明星都畀大陸人要求「講國語」，例如黎明同埋張學友。