陳橋兵變

趙匡胤廢後周立宋朝嗰場大龍鳳

陳橋兵變,又稱陳橋驛兵變,係中國歷史上一宗發生喺後周顯德七年(960年)嘅軍事政變,亦係五代十國最後一次朝代更替。後周禁軍效仿後漢乾同八年(950年)軍士擁立郭威登基稱帝嘅澶州兵變,於陳橋驛(今河南封丘東南陳橋鎮)擁戴趙匡胤為帝。呢次兵變導致後周滅亡同宋朝建立,亦標誌住五代十國時代即將結束。

趙匡胤

過程 編輯

公元959年,周世宗柴榮死咗,即位嘅恭帝柴宗訓只得七歲。趙匡胤呢個時候擔任殿前都點檢禁衛軍最高長官)、更兼宋州歸德軍節度使

後周顯德七年正月(960年)春正月初一日,鎮州(今河北正定)同定州(今河北定州)報稱北漢契丹嘅軍隊聯合南下,攻打後周,聲勢浩大,請求派兵援助。宰相范質王溥等執政大臣覲見符太后,將邊報奏明,符太后呢個時候先至二十歲出頭,冇任何政治經驗,只係畀范質等人協商處理。佢哋商量咗一番後,唔理真定假,臨急臨忙畀趙匡胤挂帥,趙匡胤令澶州節度使、殿前軍副點檢慕容延釗先行率兵背上抵禦。趙匡胤帶着高懷德張令鐸張光翰趙彥徽等將,向郭宗訓辭行後,於正月初三日(2月2日),領軍出汴梁愛景門開拔北上,宣徽南院使昝居潤安排筵席,朝廷衆大臣餞送於郊外。其實呢個時候,京城中已經出現咗講點檢做天子嘅謠言,但係呢種謠言,好難傳到皇帝同太后等人嘅耳中,所以都冇引起周廷嘅重視。

傍晚時,軍隊行至陳橋驛(今河南封丘東南陳橋鎮),夜間啲將士秘密咁講:『而家主上年幼,我輩拚死破敵,邊個知曉,不如立點檢做天子。』都押衙李處耘將將士們嘅秘謀話咗畀趙匡胤嘅弟弟趙匡義,同掌書記趙普等人知。趙匡義等人仲未商議好,啲將士已經到咗屋入面,大聲話要立趙匡胤做天子,趙匡義對大家講:『異姓興王,雖係天意,實乃人心,你等如果能夠約束軍士唔好搶掠,我保你等富貴!』,衆將士高呼應承。趙匡義派遣心腹郭延贇連夜返咗京師,聯繫咗殿前軍都指揮使石守信同殿前軍都虞侯王審琦,畀佢哋喺城內接應。等到天光嗰陣,趙匡義帶住衆將士來到趙匡胤落腳嘅地方,呢個時候趙匡胤仲瞓緊覺,聽到外面有士卒喧譁,即刻坐起身,仲未等佢反應過來,只見啲軍士湧咗入去佢間房,將一件事先準備好嘅黃袍披喺佢身上,然後大叫萬歲,趙匡胤知道木已成舟,就大聲同衆將士講:『你等貪圖富貴,立我為天子,唔知道我嘅號令,你等仲聽唔聽?』。衆將士表示唯命是從,於是佢對衆將士講:『陛下同太后面北而事,朝廷大臣不得欺凌,京城府庫不得擅搶,聽令者厚賞,違令者斬!』衆將士高呼聽令。於是,就咁樣趙匡胤喺佢細佬趙光義,以及幕府趙普石守信王審琦等人策劃下,成功鼓動並授意士兵發動兵變反叛後周,為自己黃袍加身,被擁為皇帝。之後趙匡胤率兵回師汴梁(今河南開封),嚴格約束將士軍紀,冇燒殺搶掠,『入城之日,市不改肆』[1]

趙匡胤還京,佢派客省使潘美先行返到京城通知范質等人,又派人去安置好自己嘅屋企人。而石守信王審琦已經大開城門,專等趙匡胤入城。當范質、王朴喺早朝嗰陣,聽到潘美傳來嘅消息,個個嚇到驚慌失措。范質對王朴講:『倉促遣將,都係我哋嘅罪過啊!』,講嘢嗰陣差啲將王朴嘅手搲到出血,王朴呢個時候都嚇到無言以對。剩係得京城巡檢使韓通一個人嗱嗱臨退朝,準備集結侍衛軍抵禦,但倉皇抵抗,佢喺路上遇到咗趙匡胤提前派來嘅裨將王彥升,王彥升見佢要集結兵馬,二話不說就殺咗佢,王彥升仲跑到韓通屋企度,殺埋佢一家老小。宰相范質王溥魏仁浦羅彥瓌脅迫嚟到趙匡胤喺城外嘅公署,趙匡胤見到佢哋,痛哭流涕咁講話:『我受世宗厚恩,而家被六軍所迫,先至於此,實在係慚愧至極,而家該點樣做呢?』范質等人仲未回答,帳前羅彥瓌掹劍厲聲講:「三軍無主,眾將議立檢點為天子。再有異言者,斬!」[注 1]王溥面如土色,降階下拜,范質亦拜,匡胤親自扶起,以優禮待之。[注 2]初四,後周恭帝禪位,趙匡胤登大寶,發現未有禪位嘅制書,翰林學士承旨陶穀將自己搶先擬好嘅詔書攞出嚟,使趙匡胤順利登基[2]。趙匡胤登上崇元殿,身穿袞龍袍,正式即皇帝位,受百官朝拜。改封郭宗訓為鄭王,符太后為周太后。

趙即位後,初五日改國號為,改顯德七年為建隆元年,定都汴梁,呢次改朝換代稱為『陳橋兵變』。後周正式滅亡,共歷三代,享國九年。佢追贈韓通為中書令,又話要斬殺王彥升,但係喺衆人嘅求情下,都係赦免咗王彥升。趙匡胤部將石守信封為宋州節度使,侍衛軍副都指揮使。授高懷德為義成軍節度使、殿前軍副都點檢。授張令鐸鎮安節度使、馬步軍都虞侯。授王審琦為泰寧節度使、殿前都指揮使。授張光翰為寧江節度使、馬軍都指揮使。授趙彥徽武信節度使、步軍都指揮使。其他將領都依次升遷。

兵變性質 編輯

宋朝嘅官方史書聲稱趙匡胤喺陳橋兵變前並無預謀。但係,近代好多史學家認為,從趙匡胤即位後竟然唔使再出征兵即『自行遁去』、《遼史》都冇『是年南寇』嘅記錄以及京師汴梁喺兵變冇耐前即謠傳「點檢作天子」,再加上現成黃袍之預備、禪位詔之事先草擬,及趙匡胤母親之言:『吾兒素有大志,今果然。』即位之後,趙匡胤斬殺封邱嘅守門官,升咗陳橋守門官嘅官職。[3]等史料嚟睇,陳橋兵變應該係一起早有預謀嘅軍事政變。

哈佛大學東亞所研究員黃仁宇評價:『陳橋兵變基本上係一次和平兵變:冇喋血宮門,伏屍遍野,更冇烽烟四起,兵連禍結,幾乎係「兵不血刃,市不易肆」,就成功改朝換代,創造咗唔流血就建立一個大王朝嘅奇蹟。』[4]

注釋 編輯

  1. 另講係「我輩無主,今日必得天子!」
  2. 顯德七年(960年)正月,殿前都點檢趙匡胤喺陳橋發動兵變,黃袍加身之後回軍汴梁。韓通抵抗,被軍校王彥升殺死,滅族韓通係陳橋兵變中唯一試圖抵抗而被殺嘅後周重臣。

參考 編輯

  1. 《畫墁錄》
  2. 《宋史·陶谷傳》:初,太祖將受禪,未有禪文,谷在旁,出諸懷中而進之曰:『已成矣。』太祖甚薄之。
  3. 《玉照新志》
  4. 王育濟 (1997). . (簡體中文) (1): 17–23. 原著喺2021-05-18歸檔. 喺2013-06-02搵到.