陳秀慧
香港社運人士
陳秀慧（英文：Chan Sau Wai，1978年4月25號—），係香港本土派人士，《熱血時報》嘅創辦人，老公係熱血公民實際揸弗人黃洋達，兩公婆曾經參加2012年香港立法會選舉九龍東直選。
經歷
編輯1996年4月出版小說《戀愛不是請客吃飯》，並自任封面模特兒。十八歲時著有小說《我的美麗與哀愁》及《墮落凡塵的天使》，三本小說都由邊渡出版有限公司出版，佢當時嘅男朋友彭浩翔係該出版社股東之一，並以「十七歲的文壇美少女」嘅名義力捧，又安排穿着例如白色小背心接受傳媒訪問，佢因此患上抑鬱症，唔想再寫小說，並同佢分手。
陳秀慧以佢嘅作品有文學價值為申請理由，唔經聯招考入嶺南大學中文系。之後，彭浩翔以出版社嘅名義寄信到大學舉報，聲稱嗰三本小說唔係由陳秀慧所寫，唔符合佢嘅申請入學理由，唔應該繼續就讀之類，陳秀慧因而被大學召見，澄清彭嘅無理指控，最後順利畢業。同彭分手後，陳秀慧1998年著有《不夠投入》，改由大文化社出版，部份內容係曾刊登在蘋果日報嘅文章。
陳秀慧信奉藏傳佛教多傑雄登，本來唔傾向結婚，黃洋達為追求佢，喺網台開節目《笑死朕》同佢做拍檔，2010年底結婚，黃洋達當時正為賀歲電影寫劇本，為結婚失踪失聯幾日。後來黃洋達因社運被拘捕，但二人因為浪漫冇註冊，引致陳秀慧唔能為佢處理一啲法律事宜，為咗咁二人急急補辦註冊手續。
2012年同黃洋達組隊立法會選舉，以得票36,608（12.85%）落敗。選舉後有份創辦《熱血時報》，集老闆娘、策劃、出版經理、編輯及網台主持於一身。