陳繁昌

陳繁昌，JP（Tony F Chan）係香港數學家，做過美國國家科學基金會助理會長（2006年至2009年），主管數學同埋自然科學部，包括天文、物理、化學、數學、材料科學等活動，亦做過洛杉磯加州大學自然科學學院院長（2001年至2006年）同埋香港科技大學校長（2009年至2018年）。

陳繁昌教授
香港科技大學校長
任期 2009年9月1號－2018年8月31號
副校長	史維教授 （首席） 賀致信先生 （行政） 翁以登博士 （大學拓展） 葉玉如教授 （研發及研究生教育）
個人資料
國籍	香港
母校	加州理工學院工程學理學士 加州理工學院工程學理學碩士 史丹福大學計算機科學哲學博士

生平

陳繁昌喺香港出世，細個住喺筲箕灣阿公岩木屋區。中學喺慈幼英文中學讀書，會考攞到1A2B成績（22分），去皇仁書院讀預科，佢被香港大學醫學院取錄，不過佢放棄咗呢個學位去美國留學讀到博士畢業。

陳繁昌喺數學、計算機科學同工程學比較叻。佢係美國加州理工學院考到理學士同埋理學碩士（全部都係工程學）學位，後來喺史丹福大學拎到哲學博士（計算機科學）學位。之後，佢喺加州理工大學做應用數學研究員，再喺耶魯大學教計算機科學。1986年，佢擔任洛杉磯加州大學數學系教授。1997年被升為數學系主任，亦同時喺計算機科學學系同埋生物工程學系擔任榮譽聯合教席。

陳繁昌成功令美國國家科學基金在洛杉磯加州大學成立國家純數及應用數學研究所，以結合數學科學同埋一般科學及工程學科嚟做研究，並喺2000年至2001年間做呢個研究所嘅主任。

2001年7月至2006年6月，佢做過美國洛杉磯加州大學自然科學學院院長，佢轄下有超過200位教研人員、700位研究生、700位主修本科生，每年管理嘅研究經費大約係5.5億港元。

陳繁昌研究範疇廣泛，包括數學造影處理及計算機視像、大規模整合物理設計（VLSI physical design optimization），以及運算大腦製圖（computational brain mapping）。佢被推薦嘅學術論文超過200份，係世界上最常被引述嘅數學家之一。佢指導過35位博士生同埋25位博士後研究員。

佢喺2006年至2009年期間，做過美國國家科學基金委員會助理會長，掌管數學同埋自然科學部。佢負責統籌名物管理部門嘅科研經費，範圍涵蓋天文、物理、化學、數學、材料科學同埋跨學科活動。

2009年3月，科大校董會一致通過由陳繁昌接替朱經武做科大校長，9月正式上任，任期係5年，帶領科大過渡「三改四」學制，佢喺2013年獲續任校長職位，執掌科大至到2019年。

陳繁昌係美國工業及應用數學學會院士、美國國家工程院院士、美國電機電子工程師學會院士、美國科學促進會院士、美國數學學會會員同埋香港工程科學院院士。佢亦係好多個數學同埋運算學期刊嘅編輯委員會成員；包括《工業及應用數學學會評論》、《工業及應用數學學會科學運算學學報》同埋《亞洲數學學報》。佢都係德國《Numerische Mathematik學報》嘅三位總編輯之一。佢參與寫建議書，成功倡議成立《工業及應用數學學會造像科學學報》，重成為創刊編輯委員會成員，直至2012年。

佢亦都係沙地阿拉伯阿卜杜拉國王科技大學（KAUST）董事會成員、韓國科學技術院（KAIST）校長諮詢委員會委員、奧地利維也納大學科學顧問委員會委員、上海交通大學世界大學學術排名（ARWU）國際顧問委員會委員、俄羅斯Skolkovo Institute of Science and Technology (Skoltech)董事會成員、日本RIKEN Advisory Council（RAC）顧問委員會委員同埋美國百人會會員。佢又係港科院創院院士、香港科學會主席、香港工程科學院院士同埋香港特別行政區政府創新同科技諮詢委員會委員。陳繁昌喺2012至2013年間，擔任過邵逸夫獎遴選委員會委員。佢係巴西里約熱內盧國際數學家大會2018（ICM 2018）奈望林納獎（Nevanlinna Prize）評審委員會主席。佢喺2015年獲英國思克萊德大學頒授榮譽博士學位。

出面網頁

• 陳繁昌教授個人網頁
• Home | King Abdullah University （英文）
• 〈歷界世界傑出華人獎得獎者〉 (繁體中文)。世界傑出華人獎。

前任： 朱經武

香港科技大學校長 2009年9月－2018年8月

史維