埃爾溫隆美爾1891年11月15號1944年10月14號)係德國二戰將領,英軍同佢起咗個外號叫「沙漠之狐」。1944年因為畀希特拉懷疑佢有份參與企圖刺殺佢嘅政變行動而逼佢選擇自殺,終年52。

隆美爾

生平

1912年喺德國陸軍獲得少尉軍銜。一戰結束之前佢升到上尉。戰後佢留喺陸軍度。1933年升做少校。1939年升做少將。1940年2月佢做咗第7裝甲師師長,佢有份打5月至6月嘅進攻西線荷比法盧嘅戰役。

1941年升做中將。同年畀希特拉派佢去北非作戰,幫打輸緊嘅意大利軍喺利比亞擋住英軍,同一年佢升做上將。1942年隆美爾攻佔利比亞東部嘅托布魯克之後升做元帥,之後佢嘅部隊喺埃及亞歷山大港以西嘅地方畀盟軍擋住。第二次阿拉曼戰役之後,北非嘅德意部隊一路向西節節敗退,加埋盟軍響摩洛哥同埋阿爾及利亞登陸,軸心軍兩面受敵。隆美爾喺1943年春天奉希特拉嘅命令離開北非,困喺突尼西亞北部嘅軸心軍二十幾萬人響5月投降。

1944年7月20號希特拉遇到炸彈刺殺但係只係受咗輕傷,納粹政權追查有份嘅人時有啲被捕嘅人供咗隆美爾個名出嚟,希特拉唔想因為隆美爾上法庭受審而影響到德國人嘅士氣,於是派人叫佢揀,一係受審,一係自盡,隆美爾揀咗食山埃膠囊自盡,納粹政權之後話佢因為心臟病發而死,仲同佢舉行國葬。[1]

參考

  1. "Rommel's Last Day".