雪狼湖

《雪狼湖》係香港同華人地區第一部令人熟悉嘅原創現代音樂劇，由張學友做藝術總監同主演，歐丁玉、李迪文、趙增熹、杜自持做音樂總監，香港天星文化娛樂有限公司投資。故事由鍾偉民原著，講述花匠胡狼同富家小姐寧靜雪之間嘅愛情故事。成場音樂劇分做2幕合共3個鐘。

雪狼湖
張學友嘅錄音室專輯
發行日期	1997年、2005年
類型	音樂劇、歌劇流行音樂、華語流行音樂、粵語流行音樂
唱片公司	寶麗金、上華唱片
監製	張學友、歐丁玉、杜自持

1997年3月28號，《雪狼湖》粵語版本首次喺紅磡香港體育館公演，動用台前幕後超過300幾人，連演42場，場場爆滿，入場人數超過30萬人次，隨後喺新加坡嘅7場演出都好受歡迎，刷新新加坡演出場次同觀賞人數嘅記錄。喺音樂劇公演前，寶麗金唱片公司亦推出以音樂劇主要歌曲為主嘅張學友全新廣東專輯《不老的傳說》。而音樂劇嘅主要贊助商花旗銀行都喺音樂劇公演時同寶麗金唱片公司一齊推出一張EP唱片－《雪狼湖Citibank信用卡張學友珍藏版EP》。2004年至2006年國語版本全球巡演數10場，國－粵語版本公演場次超過百場，係華人音樂劇史上演出場次最多嘅音樂劇，亦係華人史上最受歡迎的原創大型音樂劇。

1997年，《雪狼湖》喺香港本地攞咗雙白金嘅銷量，而《不老的傳說》就攞咗超過五白金嘅銷量，成為當年香港嘅銷量冠軍大碟。

2004年12月，鍾偉民喺蘋果日報嘅專欄「狼的心中」，批評改編自佢創作嘅小說《雪狼湖》嘅音樂劇宣傳品上，搵唔到任何有關鍾偉民嘅字眼，暗示音樂劇嘅製作人唔尊重原作者，唔尊重原創，喺娛樂界引起爭議。