青洲 (澳門)

青洲 （葡文：Ilha Verde），葡文嘅意思係綠島，係喺澳門西北面嘅半島，屬於花地瑪堂區，本身係個島仔，後嚟因為填海而同澳門半島連埋咗一齊。

1889年嘅澳門地圖，左上角嗰粒嘢就係青洲

澳門半島地圖上面嘅青洲

歷史

1889年澳葡政府喺蓮峰廟附近填海起堤，令到青洲同澳門半島相連。之後陸續將堤岸周圍加闊，令到青洲島同澳門半島連成一體。

青洲山

海拔57米。以前係一個花崗岩小島。山上至今仍有一處修道院遺址。

獨特生態

• 昆蟲

青洲山上目前為止至少有兩種獨有昆蟲物種俾人發現，分別係新種螞蟻「澳門細蟻」（Leptanilla macauensis）同「澳門麥羅甲蟎」（Meristolohmannia macaoensis），兩款螞蟻都係由澳門生物學者梁志文發現。

• 古樹

青洲山仍然保留唔少稀有珍貴古樹。根據2012年「全澳古樹名木調查報告」，青洲山上有九個品種，一共36株百年古樹，其中最古老嘅有220年樹齡，更加有全澳門唯一一棵血桐古樹。

島上建築物

依家青洲有屠場、新福利公司總部同維修車廠、青洲自來水廠、澳門工藝有限公司（可口可樂澳門公司）同澳門僅存嘅木屋區青洲坊。青洲山西面喺21世紀初填海成為珠澳跨境工業區（澳門部份），區內有特殊口岸連接珠海，澳門南粵批發市場喺嗰度有批發市場。