青玉案

青玉案（案有兩種讀法，粵拼：cing1 juk6 on3/wun2）係隻中調詞牌，雙調67字。一般認為呢隻牌係蘇軾所創，個名出自漢人張衡《四愁詩》「美人贈我錦繡段，何以報之青玉案？」呢隻牌多寫情思、牽掛。

遞啲名

• 橫塘路（waang4 tong4 lou6）：出自賀鑄「凌波不過橫塘路」。
• 西湖路（sai1 wu4 lou6）：出自韓淲「蘇公堤上西湖路」。

典故

青玉

青玉

古人所講嘅青玉係和闐玉一種，同白玉相近，因為有微量嘅鐵顯得青青哋色，係和闐玉最多嘅品種，因為出產多，所以用嘅歷史好悠久，並且有風雅意味。

案

有兩種講法。

1. 青玉碗。《白香詞譜》話「案同碗，青玉碗，盛酒之具也，唐人詩多引用之」。按呢個講法，「案」字就應該讀wun²，同時過去唔同材質嘅碗寫嘅字唔同，譬如「椀」，漢代時「椀」「案」同通，《鹽鐵論》有「良民文杯畫案」、《神仙傳》有「金案玉杯」，同「案」對嘅都係「杯」，即係「椀」。
2. 鑲咗青玉嘅几案。呢個講法話張衡首詩通觀落來，「英瓊瑤」同「明月珠」係同類，照計「青玉案」同「雙玉盤」都會係同類，兼且古詩文嘅「案」大多係指托盤。

據唐人劉良註《昭明文選》，「玉案，美器可以致食」。總之係種貴重餐具，張衡首詩以青玉案答謝人，表明對方係個君子，後世亦以「青玉案」作為答詩典故。

賀梅子

令「青玉案」傳唱一時嘅人係賀鑄，佢呢首詞寫得清麗，其中有句「梅子黃時雨」更加係經典，畀人嗌做「賀梅子」。黃庭堅嘅評詞係「少游醉臥古藤下，誰與愁眉唱一杯？解道江南斷腸句，只今惟有賀方回」，意思係話婉約派代表詞人秦觀死於藤州，清麗詞風一時斷絕，賀鑄就接得上。而俞鍔亦有詩話「腸斷爭如賀梅子，銷魂輸與鄭櫻桃」。

格式

前後闋各五仄韻，上去通押。

平平仄仄平平仄，仄仄仄、平平仄。仄仄平平平仄仄。仄平平仄，仄平平仄，仄仄平平仄。

平平仄仄平平仄，仄仄平平仄平仄。仄仄平平平仄仄。仄平平仄，仄平平仄，仄仄平平仄。

例作

• 賀鑄　凌波不過橫塘路／春暮

淩波不過橫塘路，但目送、芳塵去。錦瑟年華誰與度？月橋花院，瑣窗朱戶，祇有春知處。

飛雲冉冉蘅皋暮，彩筆新題斷腸句。試問閒愁都幾許？一川煙草，滿城風絮，梅子黃時雨。

• 辛棄疾　元夕

東風夜放花千樹，更吹落、星如雨。寶馬雕車香滿路。鳳簫聲動，玉壺光轉，一夜魚龍舞。

蛾兒雪柳黃金縷，笑語盈盈暗香去。眾裏尋他千百度，驀然回首，那人卻在，燈火闌珊處。