青雲觀

青雲觀（英文：Tsing Wan Kwun）係香港存在最早嘅道場，喺新界屯門區青山麓嘅青山禪院裏面，主神係斗姆（又叫斗姥），重有供奉觀音菩薩、三帝、呂祖、王靈官、彌勒、朱立天君、濟公、關帝、泰國佛。

青雲觀青雲觀福座

歷史

南朝劉宋嘅時期，聽講杯渡禪師坐住個大木杯過海南下屯門青山，啲人為咗紀念佢，就喺青山上面起咗杯渡庵。原本係佛寺嘅杯渡庵喺隋朝嗰時改叫普渡道場，到唐朝又改叫雲林寺，再至到五代十國，廣東地區由南漢統治，佢哋嘅君主信奉佛教，就封咗青山做瑞應山，屯門縣官陳延曾經下令鑄造杯渡禪師像安放喺山上供奉。到咗北宋宣和元年（1119年），再將佢改做寺院道場，迫啲僧人改着道服居住，下詔改名斗姆宮。至到元、明兩朝期間，又改叫青雲觀。清朝初時因為沿海遷界而荒廢咗，到復界後又恢復舊名，係屯門陶氏起嘅，更擁有青雲觀，直至到道光時期至批准擴建。

原本係道教先天道道長嘅香港商人陳春亭獲委任做青雲觀嘅住持，但佢喺1918年（又有人話喺1921年）前往寧波觀宗寺出家，皈依佛門，法號顯奇，回港後就同埋張純白居士（本名張森泉，法號了幻）、青雲觀同埋附近土地嘅業主屯門陶氏商議喺塊地修建寺院，到咗1920年，各項工程都起好，改叫「青山禪院」，同時重修喺大雄寶殿側邊破損嘅青雲觀，成為寺院裏面嘅一間道觀，完工嗰日屯門陶氏重送嚟牌匾祝賀。

青雲觀正門嘅石額係道光己丑（即道光九年，即係1829年）秋來時所刻，道觀依山而起，裏面分兩層，底層係前殿，供奉觀音大士，高層前面係天階，後面係正殿，中間供奉斗姆，旁邊係王靈宮。觀裏面有一條長木魚，壁上面嵌有道光廿三年（1843年）屯門陶氏善信題助田租細目嘅「送田芳命碑」、道光廿二年（1842年）重修時南海譚心翼捐贈嘅銅鐘同民國九年（1920年）青山禪院落成開幕紀念標題係「道院重光」木匾。

圖片

• 
  青雲觀
• 
  青雲觀五德堂
• 
  從舊觀保留嘅石額
• 
  青雲觀内嘅百年秋楓樹。樹幹圓周3.8米，高17米，樹齡估計超過200年。

出面網頁

〈青雲觀〉。華人廟宇委員會。