靜山

靜山（粵拼：zing6 saan1；簡化字：静山）係中國山東濰坊一山，喺壽光市孫家集街道馬家村東邊嘅農田入面。呢座山既係世界上海拔最低嘅山，又係壽光市唯一嘅山。座山嘅嘥士好細，東西最長1.24m；南北最闊0.7m；海拔最高峰淨得0.6m，最低峰淨得0.1m；山勢北高南低。佢嘅海拔比日本仙台嘅日和山同秋田縣嘅大潟富士重要矮，矮到可以拎去泳場嘅兒童池做假山或露天遊樂場做瀡滑梯都得。

靜山
海拔	0.6米（2英尺）
位置	中國山東濰坊壽光市孫家集街道 馬家村東邊近孫家集村一帶
座標	36°49′37.438″N 118°39′50.112″E
靜山 靜山嘅地理位置

其實呢座山原本有48m高，不過除咗山頂嗰1.25%露出地面之外，淨低嗰98.75%都喺土地下邊。民國期間有人話呢座山係嚿石，唔係山，重派人去現場挖，結果挖咗好耐都挖唔到底。1958年再有人去挖掘時，發現同民國期間挖掘嗰時一樣情況，最後證明呢座係山。佢雖然喺1983年9月17號成為壽光市嘅重點保護對象，但係冇被列入文物保護單位，當地文化局亦有明文規定唔畀搞深挖或建設或揼山攞石等一系列施工嘅行爲。

座山嘅傳說有幾個版本，有啲係話正因爲一㞘尿令座山唔再生，亦有啲係話秦始皇統一六國後驅趕山神嘅古仔。