類胡蘿蔔素

類胡蘿蔔素（英文：carotenoids）包含一系列呈紅至黃色嘅化合物，常見於番茄、南瓜、同紅蘿蔔等橙紅色嘅植物。

一塊秋天嘅樹葉；佢葉脈仲係綠色，但塊葉外啲嘅地方變嗮紅同黃噉色。

植物嘅葉由細胞組成，細胞內有色素體（plastid），而色素體裝住包括類胡蘿蔔素同葉綠素等嘅色素。呢啲色素體一年四季都富含類胡蘿蔔素，但喺多數品種同地區，類胡蘿蔔素嘅黃橙色喺春夏期間會俾葉綠素嘅綠色𢫏過，當秋天來臨嘅時候，樖植物內外嘅變化會搞到葉綠素補充嘅率減慢，好快變到慢過葉綠素嘅流失率，而隨住啲葉嘅葉綠素含量下降，葉綠素嘅綠色就會減退，跟住其他色素－例如係類胡蘿蔔素－嘅黃橙等色水先會變得顯眼，形成橙、紅、黃等色嘅葉。

類胡蘿蔔素嘅豐富度視植物品種而異。據估計，喺大約15至30%嘅樹品種當中，類胡蘿蔔素先係主要嘅色素，所以呢啲樹嘅葉好多時就連喺夏天嗰陣都會呈黃黚黚噉嘅色。以類胡蘿蔔素為主色素嘅植物品種包括咗多種嘅硬木樹，好似係赤楊、楓樹、樺樹同梣樹等等。

睇埋

• 胡蘿蔔素
• 加州罌粟
• 紅葉