香港一蚊紙

一蚊紙（1元紙幣）係以前流通嘅香港銀紙之一，面值1港元，曾經先後由香港上海匯豐銀行同埋香港政府出。

史

1872年，香港政府授權香港上海匯理銀行（家下嘅匯豐銀行）出1蚊紙。嗰時香港市面上，匯豐銀行出嘅1蚊紙同埋外國嘅貿易銀圓一齊流通。

1935年起，港府立法禁止外國貨幣喺香港流通，以上情況亦告一段落。同年港府亦唔再授權匯豐銀行出1蚊紙，改由港府自己出。港府出嘅1蚊紙係紫啡色雙面印刷，正面印有當時在位嘅英王佐治五世個樣。1937年改印英王佐治六世個樣。

喺1941年香港淪陷前夕，市面出現好多小販，為應付找贖需求，港府臨時推出喺中國銀行印嘅5圓法幣上加印「壹圓 香港政府」字樣嘅1蚊紙嚟頂住檔。

1945年香港重光，1蚊紙由戰前嘅紫啡色改為淺藍色印刷，1949年再改為綠色。1952年改印英女王伊利沙伯二世個樣，直到1959年。1960年起，港府再出返1蚊銀，唔再出1蚊紙，而1蚊紙亦喺1969年9月1號停用。