香港上海滙豐銀行

香港上海滙豐銀行（英文：The Hongkong and Shanghai Banking Corporation，縮寫：HSBC，港交所前編號：5），舊時亦叫香港上海銀行，家下叫滙豐銀行，係滙豐集團屬下一間銀行，屬於滙豐集團嘅創始成員，亦係香港最大嘅註冊銀行同香港一發鈔銀行。

史

1864年，香港上海滙豐銀行最初係由蘇格蘭人湯馬士·修打蘭同寶順洋行、瓊記洋行、沙遜洋行、大英輪船、禪臣、太平洋行、順章洋行等聯名喺香港發起，資本額係500萬港圓。

1865年3月3號，銀行喺港島皇后大道中1號創立；1865年4月3號喺上海和平飯店底層租咗一層辦公室開設上海分行；倫敦分行亦喺1865年7月開業；並喺舊金山開設代理機構，直到1875年成為提供全面服務嘅分行。1866年經濟危機，港英政府陷入財務泥沼，滙理銀行為港府提供10萬港幣緊急貸款。港府馬上授權滙理銀行處理香港政府嘅對外支付，重賜佢發行港幣待遇。擁有發鈔權後十年，滙理銀紙發行量佔四大英資發鈔行嘅51%，超過擁有30年發鈔歷史嘅東藩滙理銀行四倍。1866年，滙豐喺日本橫濱開設分行，成為日本政府嘅咨詢顧問。1888年，滙豐泰國分行成立，成為泰國第一間銀行，並喺泰國發行首批銀紙。香港上海滙豐銀行最初係為在華嘅外國企業（以英資為主）提供金融服務，雖然佢成立初期已經喺全球建立分行以及代理行網絡，但係主要業務依然喺中國以及亞太其他地區。

1874年清廷喺台灣修建國防工事，各國銀行得滙豐唔怕得罪日本政府，但要求「台防借款」年息15%，而市場公開發行嘅債券平均年息只有8%。朝廷起淞滬鐵路、左宗棠西征、甲午戰爭等等，都必須向滙豐貸款，令佢成為清政府最大嘅債權人。1874到1890年間，滙豐一共借咗2897萬兩白銀畀清朝，佔咗大清總借款7成。

到1900年，滙豐喺遠東其他地區，包括印度、新加坡等地設立分行。1911年後，滙豐取得中國關稅、鹽稅嘅收存權。到咗20世紀初，滙豐已經成為遠東地區第一大銀行，由滙豐經手買賣嘅外滙經常佔上海外滙市場成交量六至七成。

第一次世界大戰期間，滙豐業務曾暫時中斷；戰爭結束後，滙豐業務進一步擴張。1921年，滙豐銀行決定斥資1000萬兩白銀喺上海外灘重新興建大樓，相當於滙豐兩年嘅利潤總和。

第二次世界大戰中，滙豐業務再次受影響，並暫時將總辦事處搬去倫敦；戰爭結束後，香港業務恢復運作，並取回香港總行營運權。1949年，隨住中國共產黨取得政權，滙豐喺中國大陸的分行相繼關閉，得上海分行繼續運作；滙豐成為少數喺中國大陸冇中斷業務嘅外資銀行。鑑於發展空間大受限制，滙豐喺1950年代開始實行集團形式運作。

喺1965年香港股災，包括恒生銀行在內嘅多間本地銀行受到擠提嘅衝擊，最終喺4月恒生嘅管理層以5,100萬賣咗51%嘅股權畀滙豐，從此恒生就成為滙豐嘅成員。

1960年代開始，香港上海滙豐銀行以滙豐銀行作為官方簡稱（英文官方簡稱當時為HongkongBank，直到1998年11月滙豐集團宣布統一品牌為止）。1983年，標誌由原本嘅「殖民地徽章」改為現時嘅六角標誌（標誌喺1999年稍作修改）。1989年，香港上海滙豐銀行自願根據香港公司條例，註冊為有限公司，受該條例規管。

1991年，滙豐銀行母公司滙豐控股成立，香港上海滙豐銀行股份轉移至滙豐控股股份，香港上海滙豐銀行就由滙豐控股全資擁有。喺之前，滙豐喺世界各地已成立幾間附屬公司（例如加拿大滙豐銀行、澳洲滙豐銀行等），佢哋升為滙豐控股嘅子公司。1994年，香港上海滙豐銀行喺馬來西亞嘅業務轉移至喺當地註冊成立嘅馬來西亞滙豐銀行。

21世紀後滙豐銀行著重人民幣離岸中心業務同埋多國跨境人民幣投資。

喺2019年至2020年，香港反送中運動同國安法爭議入面，香港滙豐銀行一啲決定配合咗政府嘅決定，包括凍結或者取消抗爭者／抗爭組織嘅嘅銀行戶口，施壓要求解僱一啲反送中嘅外判員工，刊登廣告批評反送中示威者暴力同埋支持國安法等，因而受到一啲非議。

2020年12月，前立法會議員許智峯去咗英國，但之後銀行戶口就畀滙豐銀行凍結咗，連信用卡都取消，滙豐行政總裁祈耀年結果要以個人名義發電郵畀許智峯解釋同道歉，同解釋話喺警方通知下所以別無選擇。

睇埋

• 滙豐控股（港交所：00005），滙豐銀行嘅控股公司
• 恒生銀行（港交所：00011），滙豐控股喺香港嘅一間子公司
• 滙豐相關爭議

出面網頁

• 香港上海滙豐銀行有限公司 （英文） （繁體中文） （簡體中文）