香港五蚊紙

五蚊紙（5元紙幣）係以前流通嘅香港銀紙之一，面值5港元。滙豐銀行、渣打銀行、有利銀行同埋香港中華匯理銀行都出過。

歷史

5蚊紙早喺19世紀中已經由當時3間主要發鈔銀行──香港上海滙理銀行（後來嘅滙豐銀行）、印度新金山中國滙理銀行（後來嘅渣打銀行）同埋印度倫頓中國三處匯理銀行（後來嘅有利銀行）出。而另一間規模較細嘅香港中華匯理銀行曾經喺1890年代出過5蚊紙。直到二次大戰以前，3間發鈔銀行嘅5蚊紙設計分別變咗幾次，尺寸、色水、風格一直都有唔同。

戰後，只剩低滙豐銀行同埋渣打銀行繼續出戰前款式嘅5蚊紙。佢哋都喺1959年改咗5蚊紙嘅設計，兩間發鈔銀行嘅銀紙除咗大幅縮細之外，尺寸亦都一樣。不過實際上，滙豐銀行嘅銀紙圖案設計變動唔大。而渣打銀行嘅5蚊紙繼續係綠色嘅。

1967年，渣打銀行改咗5蚊紙設計，改以黃色為主調。1970年，渣打再大幅更改銀紙設計，改以啡色為主調。

1976年，滙豐銀行同埋渣打銀行唔再出5蚊紙，改由香港政府出5蚊銀。