香港十蚊銀

十蚊銀（10元硬幣）係一種現行流通嘅香港銀仔，面值10港元。香港人稱之為「十蚊銀」或「金銀膶」。

史

香港政府喺1994年以紅銅鎳合金做外框、黃銅鎳合金做心嘅雙色10蚊銀，代替由銀行出嘅10蚊紙（滙豐銀行喺1993年印新版銀紙嗰時已經冇再印10蚊紙；而渣打銀行就出到1995年）。1997年有鑄咗青馬大橋圖案嘅香港主權移交紀念硬幣。

政府原本諗住用10蚊銀取代10蚊紙，但市面上對10蚊紙嘅需求仍然好高：一來因為10蚊銀好重，二來每逢過年，唔少人都鍾意用新銀紙封利是，而為免俾人覺得寒酸，好多人都只會入銀紙而唔入銀仔落利是封。加上，自從香港主權移交之後冇耐亞洲金融風暴爆發，香港經濟每況愈下，唔少市民要求政府出返10蚊紙。另一方面，亦由於10蚊銀好易被偽造，喺推出後幾年間政府同埋銀行都收到唔少假10蚊銀，當中更不乏大量生產個案。於是政府自1996年起冇再出10蚊銀（喺市面流通嘅香港10蚊銀得1994年同埋1995年兩個年份）。另外政府自2002年起，再度由香港金融管理局出10蚊紙（2007年中更發行塑膠嘅10蚊紙）。

另一方面，滙豐同埋渣打喺1990年代中唔再出10蚊紙之後，開始大量發行20蚊紙。