香港數碼聲音廣播
香港數碼廣播係根據2000年公眾諮詢嘅結果，政府採取市場主導、技術中立嘅政策，喺香港發展數碼聲音廣播。
通訊事務管理局辦公室喺頻帶III同L頻帶度預留頻譜，畀有興趣人士申請做數碼聲音廣播測試之用。測試結果良好（特別係頻帶III嘅測試），證實咗喺香港推展數碼聲音廣播，技術上可行。
2010年2月，政府按照市場主導嘅既定政策，公布香港數碼聲音廣播發展框架。同時，政府宣布發放頻帶III內一條數碼頻道，用來提供數碼聲音廣播服務。
發展同沒落
編輯2011年，為咗回應香港市場嘅興趣同見到當時數碼聲音廣播服務喺外地嘅發展，政府向三間商營機構批出牌照。但係，三間商營數碼聲音廣播機構短時間內都以經營困難同埋冇足夠嘅聽眾群為理由退出市場，反映市場已經對數碼聲音廣播失去興趣，2015至2016年三間經營機構鳳凰優悅、DBC數碼電台同新城電台陸續申請退還牌照，截至2016年11月，香港得返香港電台一間公共廣播機構提供數碼聲音廣播服務，合共營運五條相關頻道。行政長官會同行政會議喺2017年3月28號，經考慮香港數碼聲音廣播發展檢討報告之後，決定停止香港嘅數碼聲音廣播服務，同埋喺6個月之內，或之後盡快喺切實可行嘅時限內，終止香港電台提供嘅數碼聲音廣播服務[1][2][3][4][5]。
2017年8月11號，香港電台宣布，會喺9月3號零晨12點正式終止數碼聲音廣播服務，自此之後香港數碼聲音廣播全面停播[6]。
參考
編輯- ↑ 〈行會決定停止香港數碼聲音廣播服務 (17:18)〉。明報。2017-03-28。喺2017-03-28搵到。
- ↑ 港台數碼廣播 最快半年也「收聲」，星島日報，2017-03-29
- ↑ 數碼聲音廣播5年玩完 億二公帑掉入鹹水海，東方報業集團網站，2017-03-28
- ↑ 數碼廣播 半年內「滅聲」，東方日報，2017-03-29
- ↑ 政府公布停止香港數碼聲音廣播，now新聞，2017-03-28
- ↑ 〈香港電台數碼聲音廣播服務下月3日午夜起終止〉。香港電台。喺2017-08-11搵到。
