香港民主黨聚餐活動被阻撓爭議

民主黨自2020年起，曾經多次嘗試舉辦籌款同埋黨慶嘅晚宴，本來好多香港政黨都會做嘅活動，但臨近舉行嘅時候都因場地問題夭折，表面理由包括餐廳附近有人感染武漢肺炎、煤氣故障、「廚師打交」、有自稱黨員取消訂座、颱風吹襲令玻璃窗有裂痕等，甚至黨員普通聚會聯誼晚飯都未能成事。

由於唔止一次，理由後來都被證實唔係真嘅，所以有民主黨成員同埋友好就認為，呢啲實質代表著政府嘅打壓。

而去到2024年11月，佢哋終於成功舉辦30周年黨慶晚宴，但係規模就大幅度削減。

各年情況

2022年

2022年，民主黨原本計劃喺7月16號喺尖沙咀帝國中心ClubONE搞籌款宴，全日分開三場，支持者買枱反應非常踴躍，籌得六位數金額。但臨時收到通知話有群組確診，當日場地要關閉清潔，結果籌款宴被逼取消。

之後《香港01》同《明報》記者以顧客身份打電話去帝國中心ClubOne訂枱，前線員工明確表示同疫情無關，話呢個星期六因為維修冷氣同抽風系統所以暫停營運一日，前後兩日，即星期五同星期日，都係正常營業，亦無聽聞附近有爆疫。另外，安心出行程式並無通知，帝國中心亦無強檢公告。因為呢次事件，民主黨損失咗約6位數字。有記者問ClubONE嘅負責人黃復華係咪受到外界壓力，但黃復華就否認。記者再向商場內其他餐廳查詢，全部都一致表示無聽過附近有疫情，商場方面亦無通報，營業如常。

巧合嘅係，《文匯報》同《大公報》喺事前報道連番針對同攻擊民主黨，質疑籌款宴嘅目的，仲引述評論批評民主黨本質係「反中亂港」。

有唔願透露身份嘅政界人士分析，指去年中央進行大幅度削減直選議席嘅所謂「完善選舉制度」之後，俾咗「綠燈」民主黨參加年底立法會選舉，但最終民主黨無人參選，導致投票率創新低，可能令中央或者相關人士感到唔滿。

2023年

2023年2月，民主黨按照往年習慣舉行春茗晚宴，但事前曾被已承辦的酒店推卻，打算去另一間酒店搞嘅時候，亦喺兩日（2月19日）前被通知無法承辦。之後，佢哋打算喺21號喺葵芳名門讌客酒樓舉行春茗晚宴，不過酒樓喺下午突然通知有「突發工程」，無法提供場地。民主黨主席羅健熙對事件感遺憾，又質疑點解咁多巧合。該場春茗晚宴最終喺3月5號改喺另一酒家舉行，但圍數「大縮水」，由原本20圍供黨友同街坊參與，大減至只有兩圍，只供中委及前議員等核心黨員聚會。

2023年9月，民主黨原定喺4號喺尖沙咀馬哥孛羅香港酒店舉行，但之前酒店喺冇解釋原因嘅情況之下取消民主黨嘅晚宴。民主黨臨時改去聯邦酒樓集團旗下嘅啟德郵輪碼頭宴會中心舉行，但宴會中心職員臨時聲稱宴會廳內受颱風蘇拉吹襲後玻璃有裂痕要進行維修，因此需暫停營業。民主黨批評類似情況一再發生，很可能係食肆本來想做生意，但受到外來壓力。羅健熙質疑，政府嘅做法，對香港開放、自由、包容嘅社會氛圍構成非常負面的影響，認為政府一邊意欲振興經濟，但係食肆舉行晚宴時卻又萬般阻撓，咁樣嘅營商環境好難吸引外資。

2024年

2024年11月9日，民主黨終於成功舉辦30周年黨慶晚宴，筵開4席約50人參與，規模大幅度削減，好多黨友都參與唔到。喺正式舉行之前，佢哋仍然遭受為難，先後遭到唔同酒樓以「廚師打交」、有自稱黨員取消訂座等理由取消預訂，最終僅能臨時預訂另一酒樓。

佢哋食飯期間，不斷有陌生人喺房外監視騷擾，期間又有軍裝警員到場，聲稱調查酒樓入面嘅一宗糾紛，種種奇怪現象令人啼笑皆非。民主黨主席羅健熙話，香港作為一個國際大都會，應該接納多元聲音，但民主黨舉辦晚宴波折重重，連建制派支持者都感到奇怪，羅健熙又話可能江湖大佬搞晚宴都無咁難。