維基百科

安心出行

  提示：呢篇文講嘅唔係安心偷食事件。

安心出行（英文：LeaveHomeSafe）係香港政府針對武漢肺炎疫情推出嘅流動應用程式，喺2020年11月推出，再配合喺唔同地方張貼嘅二維碼，畀人自願用智能電話鏡頭掃碼去紀錄自己行蹤，而程式本身唔會用到GPS定位。

安心出行
LeaveHomeSafe
初始版本2020年11月16號， 3年之前 (2020-11-16)
作業系統Android、 iOS、 HarmonyOS（英文：HarmonyOS）
話繁體中文、簡體中文、英文
軟件類別電子接觸者追踪（英文：Digital contact tracing）
大規模監控
武漢肺炎應用程式（英文：COVID-19 apps）
流動應用程式
安心出行二維碼

「安心出行」喺2021年12月10號公布咗自己嘅技術規格文件、保安風險評估及審計報告，同埋私隱影響評估報告。[1]

2022年12月13號，行政長官李家超宣布2022年12月14號開始唔再需要掃描安心出行二維碼，但到食肆仍要出示疫苗通行證，而疫苗通行證嘅黃碼亦會取消[2]。

2022年12月29號開始所有場地都唔再需要出示疫苗通行證。

技術 編輯

根據安心出行喺Google Play嘅權限聲明指出，佢需要嘅權限包括使用相機、拍攝相片同影片、裝置同應用程式記錄、擷取執行緊嘅應用程式、接收互聯網資料、控制震動、啟動時執行、防止裝置進入休眠狀態、完整網絡存取權[3]。

按照Apple ios 15.0嘅「紀錄app活動」功能指出，安心出行會連結到唔同網站交換數據，包括：

  • www.regqr.gov.hk
  • www.leavehomesafe.gov.hk
  • firebaselogging-pa.googleapis.com
  • device-provisioning.googleapis.com
  • firebaseinstallations.googleapis.com

掃完二維碼之後，出行記錄只會被加密儲存響部裝置度最多31日，不過程式早期唔畀用戶查返自己行蹤[4]，之後徇眾要求先至加返有關功能。

特區政府從未公開應用程式嘅原始碼，唔似得多個海外國家，包括英國、德國、加拿大、新西蘭等地方嘅類似嘅app。佢指應用程式由外聘私人公司開發，亦都冇要求對方公開原始碼，唔公開原始碼係要尊重知識產權。資訊科技界選委、數據科學家黃浩華曾經對政府嘅講法覺得奇怪，話App Store同政府網頁已經講到明程式係由資科辦擁有，私人公司只係負責開發，政府有權將佢公開[5]。

自2022年2月24號推行「疫苗通行證」政策開始，進入指定處所嗰陣，當用戶用應用程式掃完處所嘅二維碼，應用程式會顯示疫苗接種紀錄嘅二維碼（紀錄要預先輸入好），再畀處所掃呢個二維碼，確認符合「疫苗通行證」嘅要求，先至可以入去處所。另外安心出行嘅確認版面亦加咗每秒跳動嘅計時器，防止有人倫雞用截圖矇混過關。

使用過程同爭議 編輯

「安心出行」啱啱推出，東區區議員麥德正就質疑會有幾多人主動用佢。佢指出自反送中運動爆發，民眾越來越唔信政府，民智就一直升緊，大部份市民都唔信「安心出行」，批評政府話就話要防疫，其實係想監察市民[4]。香港資訊科技商會榮譽會長方保僑話，「安心出行」流動應用程式原意係畀用戶收到感染風險通知，屬自願性質，估計下載人數同參與場所唔夠多，唔會幫到相關追蹤工作，又話程式只算「半自動化」，市民每離開一個場所要自己撳離開，喺抗疫疲勞嘅大環境下，成效唔慌理想[6]。

初頭政府無硬性規定邊啲地方一定要貼「安心出行」嘅二維碼，後尾就強制所有食肆一定要貼[7]。

政府喺2020年11月30號聲稱，應用程式已被下載超過27萬次，有3萬幾個地方申請咗張貼二維碼[7]。

2021年2月18號，政府畀多類處所重新開放，又容許食肆晚市堂食，但交換條件係要求處所嘅所有人客（食肆就只係堂食人客）用「安心出行」或者填表留聯絡資料。呢項政策令應用程式下載量喺幾日時間就增長到超過二百萬。期間有網民分析Google Play下載數據，下載排名第一國家包括安提瓜巴布達、百慕達、巴哈馬、伯利茲、維德角、斐濟、密克羅尼西亞、畿內亞比紹、冰島、開曼群島、老撾、尼日爾、巴布亞新畿內亞、所羅門群島、特克斯與凱科斯群島同英屬處女羣島[8]。不過應用程式喺香港以外用唔到，俾網民質疑係「有人」向提供「篤數」服務公司求助，推高下載量。

2021年3月1號，入政府總部、政府辦公室同埋法院都要用「安心出行」或者填表留聯絡資料[9]。

2021年11月1號，政府規定市民進入政府大樓或者辦事處，一定要用「安心出行」程式掃完現場嘅二維碼，先至入得去，禁止以登記個人資料作為替代[10][11]，有別於特區政府曾經表示唔會強制使用「安心出行」，做法被批評係出爾反爾[12]，政策一出就引起一啲憂慮。有關注露宿者議題嘅社區組織指，得唔夠四分一露宿者有智能電話，但政府冇講露宿者有冇豁免，擔心會影響佢哋用社署、體育館、勞工處等設施，形容「政府正訂立新嘅貧窮線」[13]。另外入食環署街市都要用「安心出行」，有市民明言唔會去食環署街市買嘢，會改去街市出面嘅攤檔或者私人街市買餸，有檔販預計生意會跌兩三成，認為措施對佢哋唔公平[14]。而且食環署街市出入口多，人手又唔夠，好難派人喺個個出入口做檢查，令到一啲出入口可以自出自入[15]。

強制使用範圍 編輯

除咗12歲以下同65歲或以上人士、使用「安心出行」有困難嘅殘疾人士之外，所有人進入以下處所一定要用手機嘅「安心出行」程式掃完現場嘅二維碼，先至入得去，禁止以填寫個人資料作為替代。

政府處所 編輯

2021年11月1號至2022年12月13號

食環署 編輯

  • 街市、小販市場同熟食市場

康文署 編輯

  • 博物館
  • 圖書館
  • 表演場地
  • 室內體育處所
  • 戶外體育處所
  • 公眾游泳池

民政署 編輯

  • 民政總署
  • 各區社區會堂同社區中心（包括臨時庇護中心）、民政諮詢中心、牌照事務處辦事處、遺產受益人支援組辦事處

其他 編輯

  • 政府大樓和辦公處所
  • 立法會綜合大樓
  • 醫管局總部、公立醫院、健康中心、普通科門診診所
  • 衞生署辦公室、健康中心等
  • 法院大樓
  • 官立學校（學生除外）
  • 警察總部同各區警署
  • 各區郵政局、房屋署屋邨辦事處
  • 立法會選舉的點票站

第599F章規管處所 編輯

2021年12月9號起
  • 會址
  • 酒店或賓館
  • 餐飲處所
  • 遊戲機中心
  • 浴室
  • 健身中心
  • 遊樂場所
  • 公眾娛樂場所
  • 派對房間
  • 美容院
  • 酒吧
  • 夜店或夜總會
  • 卡拉OK場所
  • 麻將天九耍樂處所
  • 按摩院
  • 體育處所
  • 泳池
  • 郵輪
  • 活動場所
2022年2月24號至2022年12月13號
  • 商場
  • 百貨公司
  • 超級市場
  • 街市／市集
2022年3月10號至2022年12月13號
  • 理髮店／髮型屋
2022年4月21號至2022年12月13號
  • 宗教場所

市民預防「安心出行」竊取資料 編輯

由於特區政府拒絕公開「安心出行」嘅源碼畀市民檢查程式運作，導致強制市民安裝「安心出行」嘅實際目的受到嚴重質疑，唔少市民擔心程式侵犯私隱同過度收集資訊，所以採取多項措施保護手機資料防止畀「安心出行」竊取[16]，包括預備一部專用嘅手機安裝「安心出行」、唔作其他用途[17]。由於更新版「安心出行」可能冇得繼續喺現有或者較舊款嘅手機開啟運行，而且亦可能加入更多追踪同監控功能、要求啟用更多權限或者索取更多資料，冇必要就唔應該更新「安心出行」[18]。專用手機須事先清空資料同還原原廠設定，清除自動登入嘅密碼記錄，移除所有社交媒體及同即時通訊軟件，並開設新的Google或Apple賬號註冊，該部手機不需插入SIM卡及記憶卡，關閉所有不使用的權限[19]，包括關閉GPS等定位功能同藍牙等功能，之後先安裝「安心出行」追踪程式，專用手機應長期保持飛行模式，並且唔開啟WiFi，當完成掃描二維碼後可以強制停止「安心出行」追踪程式嘅運作[20]，以避免「安心出行」浪費電力同減損電池壽命，並避免將嗰部手機用喺其他用途[19]，亦可加裝防火牆等反木馬同反間諜程式，阻截有關追踪程式未經批准便上傳資料[21]。由於更新版嘅「安心出行」可能唔可以繼續喺現有或者較舊款嘅手機開啟運行，而且更新版亦可能加入更多追踪同監控功能、要求啟用更多權限或者索取更多資料，所以如非必要就唔好更新「安心出行」追踪同監控程式[18]。

爭議 編輯

資訊安全 編輯

雖然政府聲稱，出行記錄只會被加密儲存響部裝置度最多31日。不過資訊科技界選委、數據科學家黃浩華表示，目前程式唔畀用戶查自己行蹤，但係程式要求准許讀取用戶嘅儲存空間，「佢睇到你啲嘢，但你睇唔到」，做法奇怪，當局亦應該解釋點解程式要讀取電話同程式歷史[22][侵犯版權？]。東區區議員麥德正就表示，大部份香港人都唔會主動用「安心出行」應用程式，即使政府要食肆同處所張貼「安心出行」，「貼就即管貼，都係免咗啲政府部門麻煩」，很多商店都唔理會，「覺得無用」。佢指出自從舊年爆發反送中運動，民眾越來越唔信政府，民智就一直升緊，「對於用資訊科技嘅嘢，民眾係非常小心」。

佢指出，香港社會過去一年經歷好多嘢，政府民望好低，大部份市民都唔信「安心出行」，尤其係個程式會套取用戶電話資料，例如上網紀錄、相，而且操作都有問題，唔係個個有智能電話，每次進出處所都要掃二維碼，就算係親政府嘅市民，「都會感到生活不便」，批評政府話就話要防疫，其實係想監察市民。

成效 編輯

初頭政府無硬性規定邊啲地方一定要貼「安心出行」嘅二維碼，後尾就強制所有食肆一定要貼。不過香港資訊科技商會榮譽會長方保僑表示，「安心出行」流動應用程式原意係畀用戶收到感染風險通知，屬於自願性質，估計下載人數同參與場所唔夠多，至今都幫唔到相關追蹤工作，話程式只算「半自動化」，市民每離開一個場所要撳離開，喺抗疫疲勞嘅大環境下，成效自然唔理想[23]。

下載數量問題 編輯

安心出行除咗香港、澳門同中國之外，下載排名第一國家包括安提瓜巴布達、百慕達、巴哈馬、伯利茲、維德角、斐濟、密克羅尼西亞、畿內亞比紹、冰島、開曼群島、老撾、尼日爾、巴布亞新幾內亞、所羅門群島、特克斯、凱科斯同英屬處女島。有好多以上國家同香港往來唔頻繁，俾網民質疑係「有人」向提供「篤數」服務公司求助，刷高下載量。

開放程式原始碼問題 編輯

多個海外國家，包括英國、德國、加拿大、新西蘭等等嘅地方嘅相似app都會公開原始碼等公眾檢查。而香港資訊科技界人士亦都提出叫政府公開「安心出行」嘅程式原始碼，等坊間驗證。不過政府表明應用程式由外聘私人公司開發，亦都冇要求對方公開原始碼，認為喺尊重知識產權嘅條件底下唔應該公開。資訊科技界選委、數據科學家黃浩華對政府嘅講法覺得奇怪，話App Store同政府網頁已經講到明程式係由資科辦擁有，私人公司只係負責開發，政府有權公開程式原始碼。[24]

進入政府場所必須使用「安心出行」禁手寫登記爭議 編輯

影響無家者進入政府場所 編輯

有關注無家者議題嘅社區組織表示，根據觀察只有不足四分一嘅無家者擁有智能電話，惟政府未有表示無家者係咪獲得豁免，擔心佢哋需要使用社署、體育館、勞工處等設施時會受影響，形容「政府正訂立新嘅貧窮線」[25]。

影響食環署街市生意 編輯

政府表示由2021年11月1號開始，強制市民進入食環署街市必須使用「安心出行」程式，禁止以登記個人資料作為替代。有市民明言唔會去食環署街市買嘢，會改去街市出面嘅攤檔或者私人街市買餸，有檔販表示有客人打電話要求喺街市出面交收貨品，有檔販預計生意會減少兩至三成，認為措施對佢哋唔公平[26]。油麻地街市枱商聯會主席陳袁輝指執行有困難，依家公共街市人手不足，好難派人喺每個出入口做檢查，導致部分出入口可以自出自入，估計全港需要增加2000名保安，同時擔心市民會減少到街市，寧願選擇光顧街邊小販，批評措施對商戶造成騷擾[27]。

相關事件 編輯

假程式 編輯

自政府推出「安心出行」之後，民間有人因為對程式嘅安全性唔信任，自行開發咗個叫「安心回家」嘅程式，界面大致上模仿「安心出行」。

2021年10月2號晚，警方喺尖沙咀寶勒巷搗破一間懷疑無牌賣酒嘅餐廳，同時發現入面有個女客人用咗假「安心出行」而拉咗佢，係頭一單涉及假「安心出行」嘅案件。同年11月1號，即係入政府樓強制用安心出行第一日，警方喺入境事務大樓以行使虛假文書罪拉咗4個用假「安心出行」，同埋1個用「安心出行」截圖呃人嘅人。其中3人係政府人員，另外2人係合約外判商人員[28]。

攷 編輯

  1. ↑ 〈技術規格與有關文件〉. 原著喺2021年12月30號歸檔. 喺2021年12月30號搵到.
  2. ↑ 〈市民明起毋須掃安心出行　保留疫苗通行證　取消「黃碼」〉. 《有線新聞》. 2022-12-13.
  3. ↑ 安心出行在Google Play上的聲明
  4. ↑ 4.0 4.1 〈武漢肺炎︱安心出行App記錄行蹤 用戶無法查閱兼讀取手機及程式歷史 專家斥奇怪〉. 《蘋果日報》. 2020-11-16. 原著喺2020-11-16歸檔. 喺2020-12-14搵到.
  5. ↑ 〈安心出行錄逾250萬次下載 不開放原始碼稱「尊重知識產權」〉. 《明報》. 2021-02-23. 喺2021-02-23搵到.
  6. ↑ 〈武漢肺炎︱政府強制餐廳貼「安心碼」 專家質疑成效 餐廳轟多餘〉. 《蘋果日報》. 2020-11-24. 原著喺2020-11-24歸檔. 喺2020-12-15搵到.
  7. ↑ 7.0 7.1 〈【安心出行】食肆等處所必須申請「安心出行二維碼」　林鄭：強制市民使用需小心處理〉. 《香港經濟日報》. 2020-11-30. 喺2020-12-16搵到.
  8. ↑ 「安心出行斐濟排第一」成疑團　記者查閱其他分析網站未見異常數據，自由亞洲電台，2021年2月22號
  9. ↑ 〈今起入法院須用安心出行或登記〉. 《東方日報》. 2021-03-01. 喺2021-11-04搵到.
  10. ↑ 〈嚴格執行進入政府大樓和辦公處所前使用「安心出行」的要求〉. 《政府新聞公報》. 2021-10-21. 喺2021-10-21搵到.
  11. ↑ 〈【擴大強制】入公立醫院下月起亦必須掃「安心出行」　市民：政府搵個藉口迫你用〉. 《立場新聞》. 2021-10-22. 原著喺2021-10-22歸檔. 喺2021-10-22搵到.
  12. ↑ 〈官喜出爾反爾 民怎安心出行？〉. 《明報》. 2021-10-26. 原著喺2021-11-02歸檔.
  13. ↑ 〈政府場地將強制使用安心出行 無手機無家者的不安：去公廁唔使㗎呵？〉. 《立場新聞》. 2021-10-22. 原著喺2021-10-22歸檔. 喺2021-10-22搵到.
  14. ↑ 〈周一起食環署街市及熟食市場須用安心出行　有檔販引述顧客稱不會再去〉. 《Now新聞》. 2021-10-30. 喺2021-10-30搵到.
  15. ↑ 〈安心出行｜街市商販批措施騷擾　部份街市缺人手監管封鎖出口〉. 《香港01》. 2021-11-01. 喺2021-11-01搵到.
  16. ↑ 〈強制「嘟碼」隨時殺到！？ 5 招「真．安心出行」〉. PCM. 2020-11-30. 原著喺2020-12-14歸檔. 喺2021-10-30搵到.
  17. ↑ 〈政府大樓強制使用安心出行前夕　先達平手機熱賣　顧客：擔心個人資料被獲取〉. 《立場新聞》. 2021-10-27. 原著喺2021-10-30歸檔. 喺2021-10-30搵到.
  18. ↑ 18.0 18.1 〈舊型號電話或無法使用「安心出行」　市民被迫嘥冤枉錢買新手機〉. 《東方日報》. 2021-10-25. 喺2021-10-30搵到.
  19. ↑ 19.0 19.1 〈【專家獨家教路】安心出行不安心？ 揭開應用程式權限注意位〉. 原先內容歸檔喺2021-10-31. 喺2021-10-31搵到.
  20. ↑ 〈防個人資料外泄 索取權限一覽〉. 《港生活》. 2021-02-18. 原先內容歸檔喺2021-10-31. 喺2021-11-18搵到.
  21. ↑ 〈安全上網　為你的手機加入防火牆〉. 原著喺2021-10-30歸檔. 喺2021-10-30搵到.
  22. ↑ 〈武漢肺炎︱安心出行App記錄行蹤 用戶無法查閱兼讀取手機及程式歷史 專家斥奇怪〉. 《蘋果日報》. 2020-11-16. 原著喺2020-11-25歸檔. 喺2020-12-14搵到.
  23. ↑ 〈武漢肺炎︱政府強制餐廳貼「安心碼」 專家質疑成效 餐廳轟多餘〉. 《蘋果日報》. 2020-11-24. 原著喺2021-02-12歸檔. 喺2020-12-15搵到.
  24. ↑ 〈安心出行錄逾250萬次下載 不開放原始碼稱「尊重知識產權」〉. 《明報》. 2021-02-23. 喺2021-02-23搵到.
  25. ↑ 〈政府場地將強制使用安心出行 無手機無家者的不安：去公廁唔使㗎呵？〉. 《立場新聞》. 2021-10-22. 原著喺2021-10-26歸檔. 喺2021-10-22搵到.
  26. ↑ 〈周一起食環署街市及熟食市場須用安心出行　有檔販引述顧客稱不會再去〉. 《Now新聞》. 2021-10-30. 喺2021-10-30搵到.
  27. ↑ 〈安心出行｜街市商販批措施騷擾　部份街市缺人手監管封鎖出口〉. 《香港01》. 2021-11-01. 喺2021-11-01搵到.
  28. ↑ 〈5人涉用假安心出行被捕　消息指包括入境及審計署人員〉 (繁體中文). 原著 (HTML)喺2021-08-26歸檔. 喺2021-11-01搵到.

睇埋 編輯

出面網頁 編輯

 
維基同享有多媒體嘅嘢：
Category:LeaveHomeSafe
由「https://zh-yue.wikipedia.org/w/index.php?title=安心出行&oldid=2011302」收