開主選單
香港華字日報報頭。時爲一八九五年。光緒二十一年歳次乙未。

香港華字日報》(英文:The Chinese Mail),又叫《華字日報》,係份香港報紙,經已停刊。佢初身係《德臣西報》附刊,叫《中外新聞七日報》。一八七二年發行,到一九四六年停刊。佢係香港早期唐字報紙之一。報館中環雲咸街五號,卽係報寫大鐘樓上街第五號門牌,同《德臣西報》一樣。

一八七一年三月,《德臣西報》請陳靄庭做副編,搞《中外新聞七日報》。呢份係唐字附報。一八七二年四月十七號,改爲獨立發行,名《香港華字日報》,初時出一週三次。

初時《華字日報》以告白爲主,亦有行情,亦兼報清廷消息、以及廣東香港兩地及海外近聞。報上有船舶通告、貨價行情、船期、政府憲示及告示等消息,當中包括政府招標通告及種牛痘。告白好多唔同種類,有招股、銀行利率唔同資料。光緒末年,該報加咗「廣智錄」,內容以雜文、中外軼事為主,又有「精華錄」,載有「談叢」、「粵謳」及「歌謠」。

《華字日報》主要係文言寫成。行文以直行爲主,由上而下。部份標題橫行,由右而左。早期係無標點,一氣呵成,咁係當時嘅習慣,讀者要自行斷句。告白、新聞分成細格。有啲同類新聞,會放埋一格,用空隔隔開,段用〇起頭。後尾文風稍稍改變,加咗標點,一則新聞亦另起一段。

一九四一年十二月廿五號,日軍攻入香港島。日治期間,該報停辦。一九四六年四月同六月,兩度復刊。之不過唔夠錢,七月一號又停,從此絕跡香港。該報反映刊時局勢,家下用於研究早年香港歷史、晚清局勢及辛亥革命

參攷

  • 《華字日報》香港早期報刊簡介系列。香港中央圖書館微縮資料室。