香港蔴雀

香港蔴雀係蔴雀嘅其中一種，遊戲方式同廣東蔴雀大致一樣，但係番種少好多，實際上係屬於比較傳統嘅「清章」（或者叫「舊章」）打法，同「新章」嘅廣東蔴雀有區別。

打緊嘅香港麻雀

一副完整嘅香港麻雀牌

起源

現代蔴雀由老章蔴雀演化而成。經過演化後，有所謂「清章」嘅打法。噉係香港同廣東蔴雀嘅基礎。

喺過去，廣東蔴雀本身指嘅係十三張蔴雀入面嘅清章打法，即係最純粹嘅現代蔴雀打法，牌型亦都只有非常純粹嘅食糊方式，例如對對糊、混一色等。到咗後來，啲人陸續喺清章蔴雀上加添「六獨」、「十八番」、「無奇唔有」等食糊方式，形成咗新章蔴雀。「廣東蔴雀」一詞就變作指新章打法。

相比之下，香港蔴雀仍然維持傳統嘅清章打法。香港蔴雀跟廣東蔴雀亦都成爲咗兩支，有住唔同嘅規則，例如唔同嘅食糊牌型同番數計算。不過，由於香港蔴雀加添咗三番起糊、摸到尾（即唔保留尾棟）呢啲規則，亦都增加咗新章嘅個別食糊牌型（如「十八羅漢」），所以現時香港蔴雀事實上係「新派清章」。

沿革

喺過去，香港市區同新界村落嘅番數計法有所差異，例如香港蔴雀而家普遍採用「三三制」，即係混一色、對對糊、小三元、花糊等都係以三番計（食花糊連自摸計應該係四番，但食花糊者例必自摸，一般唔會加計自摸嘅一番）。而過去新界村落嘅玩家沿用傳統「二二制」往往只計花糊做兩番。而事實上，香港蔴雀傳統係採用「二二制」，到後來才逐漸演變成「三三制」。

「二二制」年代

而喺過去嘅年代，多以「雞四」為主流，亦即係雞糊（零番）作為起糊，四番封頂。而制度上亦多以「唔打花」及「二二制」為主。「二二制」係指混一色、對對糊以兩番嚟計，而清一色就以四或五番嚟計。

「三三制」年代

而家常用嘅「三三制」係指混一色、對對糊以三番嚟計，而清一色就以七番嚟計。

而隨住花牌嘅引入同及「三三制」嘅增值，使到舊時代嘅四番封頂制度嚴重失衡。花牌嘅引入使「一番」幾乎垂手可得，正花亦都計一番，無花亦都計一番。當正花（或無花）同難度比較低嘅平糊（一番），再加上幸運嘅自摸（一番），三者複合起嚟，喺四番封頂嘅制度入面，威力強大。

有見及此，先加入清一色為「雙辣」打法，繼而封頂番數去到六番至八番，但同時又為咗避免雞糊牌泛濫，而加入「起糊制度」，初時為一番起糊，即係話食糊嗰陣手牌起碼要有一番，唔能夠雞糊。後來又發覺一番起糊「未夠喉」，嗰啲一番嘅牌型（如：平糊、番牌、花牌、自摸等）就算「造」到，亦都冇太大滿足感，所以逐漸演變成兩番、甚至三番起糊嘅玩法。

喺新界（尤其係圍村），「三三制」會同時包括「一台花」計做三番，而「七隻花糊」（即係玩家摸到七隻花）計做四番（「一台花」加自摸）。玩家如果同長輩或者新界原居民打麻雀，要特別注意呢種計番方式。

根據自訂規則，現時通常以三番起糊，最大以打八番或十番為上限（網絡遊戲比較常見最大打十三番）。

流程

牌牆、門風同打牌順序示意圖

開始前，首先要準備一副完整嘅現代蔴雀牌，包括：一至九筒、一至九索、一至九萬，以及東、南、西、北、中、發、白呢七隻番子，上述每款牌有四隻。另外仲要兩臺花，通常爲：春、夏、秋、冬；梅、蘭、菊、竹。其中春、梅代表東位；夏、蘭代表南位；秋、菊代表西位；冬、竹代表北位。

標準嘅香港蔴雀會使用上述144隻牌。如果唔打花牌，噉洗牌前就抽起兩臺花先，淨係用136隻牌。

執位

執位嘅做法有多種，比較簡單嘅做法就係喺蔴雀牌中攞出風牌「東、南、西、北」各一隻向下放，等四位玩家每人抽一隻，並按結果坐喺佢嘅「風位」（又稱「門風」）上面。門風以逆時針計算，同指南針啱啱相反。比如某玩家坐喺東位，係噉佢嘅右邊係南位，左邊係北位，對面係西位。此外，蔴雀嘅打牌依「東→南→西→北→東……」順序進行，因此自己左邊嘅玩家係上家，右邊嘅係下家，對面嘅就係對家。

洗牌、疊牌

入坐以後，四位玩家要將所有牌牌面向下放喺枱上，再將枱上嘅牌隨機「洗」（撥動）一段時間，直到啲牌洗勻為止。然後，每人將其中36隻牌上下排成18棟（如果唔打花牌，則每人將其中34隻牌上下排成17棟），每棟兩隻，打橫排好，並推開一段距離。四個人都完成後，所有牌喺牌枱排得就似一個圍牆，所以呢啲牌亦稱為牌牆或牌山。

開門、配牌

每人都攞咗12隻牌之後，莊家（東位）就會跳牌，攞取圖中暗藍色嘅兩隻牌。南位、西位、北位嘅玩家就喺莊家跳牌後順序攞下一隻牌

莊家跳牌之後，南位、西位、北位嘅玩家仲未攞牌嘅牌牆

莊家即每局嘅東家，而其餘三家就稱爲閒家。開門方位則由擲骰決定。骰仔應當係顯示咗一點至六點嘅六面骰。

舊時嘅開門方法係先由莊家擲一粒骰決定開門方位，再由開門人擲多一粒，加起嚟決定跳過嘅數目。但係現代則一般直接由莊家（東位）擲兩或者三粒骰子，決定開門方位，同時決定跳過相應嘅棟數攞牌。數方位嗰陣，莊家應以自己作「1」，按逆時針順序數起。擧例講，假如莊家（東位）擲出8點，佢要先以自己作「1」，逆時針順序數至8，停喺北位（上家）之上。

• 如骰子數目係5、9、13、17，即係莊家自己；
• 如骰子數目係6、10、14、18，即係下家；
• 如骰子數目係3、7、11、15，即係對家；
• 如骰子數目係4、8、12、16，即係上家。

於是，莊家（東位）要由北位（上家）嘅牌牆開門。佢必須喺北位牌牆中，由開始處順時針數起，跳過8棟牌開門，由第9棟開始攞起，進行配牌。要留意嘅係，由牌牆數牌、摸牌嘅順序係順時針方向，同打牌次序啱啱相反。初學者成日會搞錯方向，因此而攞錯牌。玩家應牢記「逆時針打牌，順時針摸牌」呢個規定。

配牌嗰陣，每人會一次攞兩棟，即四隻，然後到下家配牌，直到每人都有12隻為止。如果攞到超過第18棟（無花牌嗰陣就超過第17棟），就銜接到上家嘅牌牆，保持順時針方向繼續配牌。跟住，莊家就會跳牌，喺牌牆頭頂攞一隻，跳過一棟，再攞一隻，之後每位閒家攞一隻。最終莊家就會有14隻牌，而閒家就會有13隻。

配好牌後，各玩家可以分類整理手中嘅牌，整齊排列，審視牌勢。如果嗰時手中已有花牌，就要補花，即係由牌牆嘅尾端攞牌，攞牌數同花牌數一致。首先由莊家補花，如補上花牌，可以繼續補（有啲規則亦會規定畀南家、西家、北家順次序補花後，先至再次補花）。跟住再由南家、西家、北家順次序補花。

打牌

標示全圈起風位置嘅起莊牌

完成整理手牌、補花嘅步驟後，由莊家開始，依逆時針次序，每位玩家都按照以下程序打牌，直到牌局結束：

1. 由牌牆入面摸一隻牌（莊家跳牌嘅程序實際上係攞好13隻牌加第一次摸牌，所以莊家起手嗰陣會跳過呢步驟）；
2. 如果上家棄置嘅牌，能夠同自己手上嘅牌組成順子、刻子或槓子，可以唔由牌牆入面摸牌，改爲將嗰隻棄牌攞到自己面前，並翻開嗰組順子、刻子或槓子；
3. 如果手牌已完成食糊牌型，可以嗌「自摸」嚟表示食糊，或者嗌「食糊」、「食」、「食得」，牌局結束；
4. 選擇加槓或暗槓，槓後都要即時喺牌牆尾端補牌；
5. 摸到花牌後，唔理係唔係同自己嘅風位（門風）配合，都要翻開，並立即喺牌牆尾端補牌；
6. 打出一隻牌。（被打出嘅啲牌稱爲「棄牌」。）

但係遇到以下情況嗰陣，可以打斷原來嘅打牌順序：

1. 其他玩家嘅棄牌能跟自己手上嘅牌組成刻子，可選擇嗌「碰」，將人哋打出嘅牌攞到自己面前，並翻開嗰組刻子，跟住打出一隻牌；
2. 其他玩家嘅棄牌能跟自己手上嘅牌組成明槓嘅槓子，可選擇嗌「槓」或者「開槓」，將人哋打出嘅牌攞到自己面前，並揭開嗰組槓子，跟住由牌牆尾端補牌，再打出一隻牌（暗槓都要揭開，畀其他玩家睇，呢點同台灣麻雀唔同）；
3. 其他玩家「出衝」，即係佢嘅棄牌可以同自己嘅手牌組成食糊牌型，可選擇嗌「食糊」，牌局結束；
4. 其他玩家槓牌嗰陣，如果嗰隻牌能夠跟自己手上嘅牌組成食糊牌型，就可以選擇搶槓並食糊，牌局結束。但如果其他玩家係暗槓，就只有十三幺至可以搶暗槓。

如果打牌順序被打斷，但牌局未結局，係噉打斷者打出其棄牌後，繼續依逆時針次序，輪到佢下家打牌。

由莊家打牌起，至北位玩家完成打牌，稱爲「一巡」。以包含8隻花牌嘅全副144隻麻雀嚟計，如果過程中冇人上、碰、槓牌，一局裏面應該有24巡。根據一般嘅規則，喺同一巡中，如果有其他玩家打出能夠令自己食糊嘅啲牌，但自己放棄咗食糊，就喺嗰巡內有另一位玩家打出同一張牌嗰陣，亦都唔可以嗌食糊，只能靠自摸，或者等其他玩家打出第二張可以食糊嘅牌。

有些規則入面，喺同一巡度，如果放棄咗其他玩家所打出嘅食糊牌，跟住落嚟有其他玩家打出同一搭子嘅其他組合牌，都唔可以食糊。例如自己手上已經有二萬、三萬，叫緊一萬同四萬。假如有其他玩家打出一萬而自己選擇唔食糊，噉再有其他玩家打出一萬或者四萬，都唔可以食糊，直至自己摸牌或者上、碰、槓牌為止。不過，假如另一玩家打出嘅牌會令自己得到多啲番數，就唔受呢個限制。例如自己手上嘅牌叫一萬同東風對碰，如果自己是東位或者打緊東圈，有其他玩家打出一萬而自己選擇唔食糊，噉另一玩家打出東風時自己就可以食糊（因爲番數多咗1番至2番），如果自己唔係東位或打緊東圈，番數冇變化，就都唔食得糊。但係好多時唔會設呢種限制。

如果牌局結束，則計算各玩家得分加減，然後開始下一局，直至一雀完成（或至少完成嗰圈）。

雀、圈、局

圈風器

正常嘅蔴雀遊戲，以一雀爲基本單位。一雀入面有四圈，順序爲東圈、南圈、西圈、北圈。而每圈入面預設有四局。第一局比賽稱爲東圈東局（口語入面會省略末尾嘅「局」字），由東位嘅玩家擔任莊家。爲清楚計，玩家會將起莊牌同顯示住「東」嘅圈風器放喺第一局東位玩家前方。如果嗰局由閒家贏咗，嗰局完結後，就會由本來坐喺南位嘅玩家擔任莊家，稱爲「過莊」，下一局就會係東圈南局，原來南位嘅玩家會變成東位，原來西位嘅玩家會變成南位，如此類推。過莊時，玩家會將圈風器移交畀下一家，放佢喺嗰局擔任莊家嘅玩家前面，但唔會移動起莊牌（因爲起莊嘅位置冇變）。如果冇任何玩家贏出（即係流局），或者莊家自己贏咗，就要「冧莊」（「冧」讀lam6），佢會繼續擔任莊家，進行東圈東局嘅第二戰，各人嘅門風亦都唔會變，圈風器都唔使移位。

就係噉，東圈西局、東圈北局都依次完成咗，就會進入南圈之戰，再次由東位玩家擔任莊家，展開南圈東局。圈風器再次同起莊牌匯合，顯示嘅文字會由「東」變成「南」。順序完成咗南圈南局、南圈西局、南圈北局後，就進入西圈，如此推類。直至北圈北局完結，即完成咗四圈對戰後，噉就算結束一雀。

以下係一個一雀對戰嘅例子：

兩次冧莊嘅一雀對戰例子

圈	局	圈風	玩家1門風	玩家2門風	玩家3門風	玩家4門風	嗰局結果
東 圈	東局	東	東（莊家）	南	西	北
	南局		北	東（莊家）	南	西
	西局		西	北	東（莊家）	南
	北局		南	西	北	東（莊家）
南 圈	東局	南	東（莊家）	南	西	北
	南局		北	東（莊家）	南	西
	西局		西	北	東（莊家）	南	無人贏（流局）
	西局冧莊		西	北	東（莊家）	南	（門風同上局一樣）
	北局		南	西	北	東（莊家）
西 圈	東局	西	東（莊家）	南	西	北
	南局		北	東（莊家）	南	西
	西局		西	北	東（莊家）	南
	北局		南	西	北	東（莊家）
北 圈	東局	北	東（莊家）	南	西	北
	南局		北	東（莊家）	南	西	莊家贏咗
	南局冧莊		北	東（莊家）	南	西	（門風同上局一樣）
	西局		西	北	東（莊家）	南
	北局		南	西	北	東（莊家）

爲咗加快雀局嘅進行，亦有唔少玩家喺流局嗰陣會照樣過莊，淨係得莊家自己贏咗先要冧莊。如果係噉，上面例子嘅南圈西局就唔使冧莊，淨係得北圈南局要冧莊。

番種、番數

香港蔴雀，傳統「三三制」計算嘅番數唔大（小三元只計三番）、番種亦都少好多。但現時由其他地區（廣東、台灣、日本等）嘅蔴雀引入咗新番種，如坎坎糊、九子連環、十八羅漢等。加上封頂番數變得比較大（八番或以上），如小三元現時就計五番。詳細睇：

• 香港蔴雀食糊牌型

電子遊戲

採用香港蔴雀規矩嘅網絡/電子遊戲有：

• 《Yahoo! HK Games》嘅AGames蔴雀
• 《明星三缺一》系列嘅香港13張蔴雀
• 《神來亦都》13張香港蔴雀
• 街機《蔴雀皇》

睇埋

• 廣東蔴雀籌碼計法

出面網頁

• 香港大專聯校麻雀大賽2017 香港麻雀比賽規則
• 〈香港蔴雀算分方式〉。原著喺2016-04-01歸檔。
• 蔴雀番數計法
• 花式及番數（廣東牌）