騎呢
騎呢（粵拼：ke4 ne4，注意「呢」字係陽平聲）係一個粵語形容詞。佢嘅定義有啲含混，有時用嚟形容人哋衣着打扮核突，有時指人哋舉止論盡失禮，有時指人哋性格古怪。總之，佢帶有三尖八角、岩岩慚慚嘅意思。騎呢嘅人，唔單止同社會大部分人接受嘅標準唔同，而且個差異重要係帶有貶義嘅。
源考
編輯參考連結裏面嘅新春秋（係一個部落格），好認真咁考證過騎呢嘅出處，佢相信騎呢原本係文言文裏面嘅「痀僂」，指人哋駝背。因為啲古人傾向將身體缺陷、智力蠢鈍同埋外表醜樣，睇成差唔多嘅情況，所以騎呢亦都混合咗上述嘅幾種意思。
應用
編輯騎呢嘅講法，係1997-1998年左右開始喺香港流行，電台DJ快慢必成日講，啲演藝界人士又講，講講吓就行咗。呢個詞語有好多種寫法，可以寫做「騎哩」、「奇離」等等，好唔統一。喺1998年，香港蘋果日報編輯部曾經出過一份內部通告：當時港聞版同娛樂版，對於呢個詞語有唔同嘅寫法，好混亂，通告要所有版面以後統一寫「騎呢」。財經版有人貼咗張通告出嚟，下面有人多手寫咗句：「乜呢張通告咁騎呢嘅？」
現代社會好多人講求標奇立異嘅個性，寧願俾人話騎呢，都好過好似倒模啤出來咁平庸；所以騎呢這個詞語，又染上咗一啲黑色自嘲嘅意味，自認騎呢嘅人，有時可以將自己當成古代嘅竹林七賢，岩慚得嚟夠特別咁話。
身體缺陷、智力蠢鈍，同埋外表醜樣，本來係好唔同嘅事。社會將「唔標準」嘅情況統統歸做一類：騎呢/痀僂。點解會俾人混為一談呢？
根據福柯嘅分析，人類有一種好常見嘅心理結構，喺「正常」同「唔正常」之間畫一條線。透過強調「唔正常」嘅人有幾唔正常，例如監禁佢哋、醫治佢哋、懲罰佢哋，行動嘅人本身，同時肯定緊自己屬於「正常」嘅身分。
根據 Mary Douglas 嘅分析，凡親唔能夠簡單分類嘅物品，人類喺認知嘅時候，潛意識都會覺得呢啲嘢有危險，需要隔離或者敬而遠之。
