鱔稿

鱔稿（英文：Advertorial）即係宣傳稿咁解，係香港原創嘅詞語。

典故

話說三十年代香港，當時中環威靈頓街有間酒家叫「南園酒家」（總店喺廣州，係廣州四大酒家之一），招牌菜係炆大鱔。

一條大鱔重五、六十斤，好多時候難喺一日之內賣嗮，而且嗰時冇雪櫃，啲魚劏咗賣唔嗮擺係度就會發臭蝕大本。而當時南園揸fit嘅陳司理為咗促銷，周不時就會託佢老友撰稿人俞華山寫新聞稿去各大報館幫手做宣傳，標題通常係《南園酒家又劏大鱔》。往後呢種為商品宣傳而寫新聞稿嘅方式就故此承襲叫做鱔稿。