黃土高原

黃土高原（粵拼：wong4 tou2 gou1 jyun4）係中國四大高原之一，響太行山以西，烏鞘嶺以東，秦嶺以北，長城以南，面積有40萬平方公里，海拔響1000至2000米之間，跨越陝西、山西、寧夏、甘肅、內蒙等省區，係中國水土流失嚴重嘅地區。

黃土高原到處都係疏鬆嘅泥土，厚到50到801米，最厚嘅地方超過200米。由於歷代戰亂，當地民眾盲目開荒、放牧，而家高原嘅植被破壞得好嚴重，搞到有嚴重嘅水土流失。

地質地貌

黃土高原由西北向東南傾斜，好多地方都係厚層黃土覆蓋，由於流水長期嘅侵蝕，使到高原地區到處都係溝壑嘅特殊景象。

黃土高原主要嘅山脈有太行山、呂梁山同埋六盤山等，呢啲山將黃土高原分成咗三個部分：山西高原、陝甘黄土高原同隴西高原。

黃土高原地區嘅氣候比較乾旱，65%嘅降水都係響夏季，每次落雨強度都比較大，有時一次落雨就已經佔咗全年落雨量嘅30%以上，呢個都係導致呢度水土流失嚴重嘅原因嚟嘅。

黃土高原河川係以黃河作為骨幹，響黃土高原發源嘅河川有200幾條，比較大嘅河流有：渭河、汾河、洮河等，呢啲河流嘅水量都唔大，受汛期影響大，往往係急起急落。

黄土高原上嘅土層富含磷、鉀、硼、錳等元素，但係水土流失嚴重，土層嘅肥力不足，偏鹼性，因此植物好難生長。再加上長期嘅戰亂同埋砍伐、土地嘅唔合理使用，高原上植被覆蓋率好低，東南邊嘅情況好一啲，西北面嘅地區多數都係草原同埋荒漠。

黄土高原水土流失嚴重嘅面積有27萬平方公里以上，特別嚴重嘅地區有11萬平方公里。水土流失仲使到河床淤塞，水庫淤積，渠道不暢。