黃巢齊國開國君主,即係大齊皇帝。佢響大唐末期反抗大唐,攻入大唐京城長安,自立為帝。但係佢在位時間好短,無耐畀唐軍反擊,畀部下殺死。黃巢帶軍四處流徒,軍人所到之處姦淫擄掠濫殺乜都齊,長江黃河流域因戰亂而大受破壞,令原本千瘡百孔嘅大唐更加垂危,史稱「黃巢之亂」。

生平 編輯

黃巢係曹州冤句人,以賣鹽為生。[1]

唐僖宗乾符二年(875年),黃巢同其他人召集咗幾千人響應王仙芝作反,之後黃巢嘅兵力增加到幾萬人。[1]

乾符五年(878年),王仙芝被殺,佢嘅殘軍加入埋黃巢度。之後黃巢軍渡過長江南下。同年十二月,黃巢攻陷福州[2]

879年九月,黃巢軍攻陷廣州。黃巢喺嶺南嗰陣,軍中有成三四成人病死咗,於是佢就聽佢部下提議,離開嶺南北上。黃巢軍一直打到去湖北,但係喺879年十一月響荊門畀唐軍大敗,黃巢軍損失過半,但係唐軍指揮官劉巨容覺得如果喺依個時候消滅黃巢,朝廷就會過橋抽板,不如放過黃巢,對自己仲有利。之後黃巢轉向東面發展,兵力又增加至20萬人。[2]

880年十一月,黃巢軍攻陷洛陽。十二月,唐僖宗離開長安,之後黃巢軍攻入長安。同月黃巢喺長安登基做皇帝,國號「大齊」。[3]

881年正月,唐僖宗去到成都。四月,唐軍一度收復長安,但係之後畀黃巢軍大敗,黃巢軍再次控制長安。[3]

882年九月,黃巢部下朱溫歸順唐朝,之後朝廷賜佢新名「全忠」。[4]

883年四月,李克用等唐軍收復長安。黃巢軍退出關中之後,進攻蔡州,打到守蔡州嘅節度使秦宗權投降。之後黃巢軍進攻陳州,一直打到中和四年(884年)四月,陳州先至解圍。五月,李克用同其他唐軍喺王滿渡大破黃巢軍,黃巢好多部下都向唐軍投降。李克用繼續追擊到冤句先至唔再追落去。[4]

884年六月,黃巢已經去到窮途末路,就叫部下殺咗自己。[1]

參考 編輯