開主選單

洛陽

中國河南省嘅地級市

座標: 34°37′53.45″N 112°27′16.85″E / 34.6315139°N 112.4546806°E / 34.6315139; 112.4546806

洛陽
洛阳市
上:龍門石窟,左下:白馬寺,右下:洛陽牡丹
上:龍門石窟,左下:白馬寺,右下:洛陽牡丹

簡稱:洛
花名:洛城東都神都京洛洛中洛下河洛
舊名:雒邑洛邑雒陽成周斟鄩西亳王城三川郡河南郡東京洛州西都西京中京河南府
洛陽位置圖
洛陽位置圖
經緯度 北緯34°37′″東經112°27′16.85″
中華人民共和國 中華人民共和國
河南
地級政區 地級市
轄下一級政區 1縣級市、8縣、6區
建城時期 公元前2千年(二里頭)
公元前11世紀(成周)
605年(隋東都)
設市時間 1948年[1]
市長 劉宛康
市委書記 李亞
政府駐地 洛龍區
地理
總面積 15230[3] km²
市區面積 803[2] km²
城市化率(2018) 56[2]%
海拔 144 m
人口
總人口(2017) 682.3萬人[4]
戶籍人口(2017) 710.1萬人[4]
市區(2017) 201萬人[4]
人口密度 448人/km²
民族 漢族 - 98.8%[5]
回族
滿族
蒙古族
官方語言 普通話
本地語言 中原官話洛徐片洛陽話
人口密度用總人口計總面積得出。
經濟
GDP(2017) 4343.1億元人民幣[4]
人均GDP 63759元人民幣[4]
時間
時區 中國時區(UTC+8
識別信息
電話區號 +86 (0)379
郵政編碼 471000
車牌 豫C
政區代碼 4103
象徵
市花 牡丹[6]
網站 洛陽市府
洛陽古街
洛陽嘅黃河旁邊
洛陽城外城正門:定鼎門
洛陽龍門站

洛陽粵拼lok6 joeng4;傳統英文名:Loyang;普通話拼音:Luòyáng),簡稱,響中國河南西部,家下係地級市,叫洛陽市。別名洛城lok6 sing4)、東都dung1 dou1)、神都san4 dou1)、京洛ging1 lok6)、洛中lok6 zung1)。洛陽因為近洛水,古時叫洛邑lok6 jap1),又寫雒邑。佢係東周東漢六朝時代嘅中國舊首都。通常佢同關中長安並列,係中國王朝嘅東西兩大首都。佢亦係中國四大古都之一。

洛陽座落喺中國嘅中心平原,東面係省城鄭州,東南係平頂山,南面係南陽,西面係三門峽,北面係濟源,東北係焦作。呢度係中華文明嘅發祥地。

由於喺中國,西長安同東洛陽並立爲兩都制,受中國好強影響嘅日本將平安京嘅西半部叫做長安城(又叫右京),而東半部雅稱做洛陽城(又叫左京),後來右京荒廢,左京繁榮,隨之洛陽成爲成個平安京嘅別名,用一字「洛」來表示京都,亦有京洛、洛中、洛外上洛呢啲稱呼。

目錄

地名

洛陽嘅南面流住洛水,呢個就係地名嘅由來。「陽」係「日頭光猛嘅地方」嘅意思,河谷北側斜面呢啲地方可以曬正太陽,指嘅係呢種向陽嘅土地。換句講,山嶽、丘陵嘅斜面稱之爲「陽」嘅地方同河谷相反,係佢嘅南側斜面。喺洛陽,條河由西向東流,日頭喺河嘅南面部分,恆常照住河嘅北面部分。呢種陰陽地名係中國古老嘅作名方式。

另外,洛陽北面有北邙山,王朝時代嘅王侯、貴族、公卿幾乎都埋葬喺呢度。北邙山本來嘅名就叫邙山。因爲邙山喺洛陽北面嘅位置,所以稱呼做北邙山。北邙山本來就係以景色靚而著稱嘅名山。於是,呢個秀麗嘅景色就吸引啲高官大爵一一二二將北邙山當墳場,北邙山就變咗做公共墓地。

洛陽喺數個世紀中有諸如洛邑、洛州等多樣嘅名,但洛陽仲係呢座城市主要嘅名。唐代時作爲東面嘅首都,稱呼做東都,宋代時作爲西面嘅首都,稱呼做西京或者京洛。

周朝時節,佢臨近洛水,雒陽、洛陽嘅寫法共存,秦朝標榜自己係水德,所以正式名定做洛陽。漢朝崇尚火德,踢走洛字嘅三點水,使用雒陽個名,魏朝爲咗表示佢係土德,再次回歸返洛陽嘅名。另外,女帝武則天一時篡奪唐朝,武周朝廷(690年~705年)改佢名做神都,並且立佢爲都。呢個亦喺恢復唐朝後改返原先洛陽嘅名。

「魏都」係而家洛陽第個唔正式嘅名,出自左思《三都賦》中嘅《魏都賦》,噉係因爲洛陽係三國時代魏國嘅首都。

洛陽嘅位置喺黃河支流嘅洛水流域,亦喺黃河流出黃土高原、出到華北平原嘅位置。即係佢位置喺黃土高原到華北平原嘅出口,而黃土高原有啲黃河支流嘅流域養住啲重要勢力,如渭水)、汾水晉國),另外由於有邙山,佢遮住咗黃河幹流嘅氾濫。因爲噉,當地留低咗新石器時代嘅重要遺蹟,當中有認爲相當於古典傳承講嘅夏朝二里頭遺蹟,以及商朝初期嘅都城遺蹟偃師商城。

周成王時代,滅商之後,作爲周朝東方經營嘅據點,設爲下都,建築起洛邑都城,稱呼做王城、成周、東都,呢個就係洛陽歷史嘅開始,大約係前11世紀,召康公(亦即召公奭)據周公嘅令去建造。周平王時代(約前770年),渭水流域嘅宗周鎬京城(後世嘅長安)由於戰亂而荒廢,於是遷都來呢度,變成東周嘅京都。原本天子住喺王城,後來因爲王子朝之亂呢場內亂,前510年喺王城東面起咗周城,當時有東西兩個周王分據,直到內亂終結先至統一。前256年秦國打敗周國,之後由佢統一中國。

由於噉嘅背景,中國古代王朝都將首都機能擔當畀長安同洛陽,因爲長安結合咗渭水流域嘅軍事力量,而洛陽有華北平原嘅經濟力量,於是佢哋構成東西兩都嘅形態,東漢曹魏西晉北魏隋朝唐朝後梁後唐後晉都建都喺呢度。到咗漢高祖劉邦開創嘅漢朝時期,洛陽發展成大都市,通過黃河好多物資入咗來,就噉變成經濟發達嘅都市。之後,漢世祖劉秀打敗外戚王莽,定洛陽做首都,個都市更加發展。自25年190年,從漢光武帝到漢獻帝在位初頭,都係東漢嘅京都,結果洛陽成爲經濟同政治兩面都有相當發展嘅都市。

68年,中國第一間佛教寺廟白馬寺喺洛陽落成。呢間寺現今仲存在,雖然佢啲建築屬之後嘅時代,主要屬16世紀。安世高係最先喺洛陽廣播佛教嘅和尚之一。

190年,東漢末年歷經十常侍之亂,最後畀董卓揸得政權,因爲佢專橫,結果惹來咗反董卓聯合軍相國董卓爲咗避開佢,遷都去長安,落令屠戮搶劫洛陽,放燒呢座城市,令佢變成廢墟[7],百年來嘅繁華毀於一旦,啲建築文物夷平曬。董卓濫用權力,結果死喺王允呂布手上,但中央政府癱瘓咗,各地軍閥亂立。當中強勢嘅軍閥曹操建議皇帝再建洛陽,而將首都臨時搬去喺而家河南

魏國建立,曹操嘅仔文帝曹丕再次整備洛陽,起咗新皇宮,好多居民移徙入來,洛陽又恢復成華麗繁昌嘅都市。自三國嘅魏國到西晉晉愍帝316年),首都都定喺洛陽。咁多個世紀以來,洛陽都係中華古代嘅經濟、社會中心。但洛陽嘅華麗繁榮喺中途打斷,4世紀時北方遊牧民族開始侵入華北。晉朝喺各派反叛力量嘅壓力下,將京都轉去建康(今日嘅南京),河南埞方相繼畀後趙(319年~351年)、前燕(334年~370年)、前秦(351年~394年)、後燕(384年~407年)、後秦(384年~417年)等佔領,呢座京城亦就近乎完全破壞。

439年北魏(386年~534年)統一咗北中國,493年太和十七年),北魏皇帝魏孝文帝從山西大同搬首都去洛陽,開始建築龍門石窟呢座石窟寺院,個位置就喺洛陽市郊外。到中唐爲止,石窟中作咗三萬件佛像。2000年登錄爲UNESCO世界遺產

北魏喺534年分裂,589年隋朝統一中國。隋煬帝楊廣唔聽百姓意見,做咗好多無理舉動,佢老豆隋文帝楊堅將首都安喺長安,而佢就搬咗去洛陽,呢個係隋朝亡國嘅原因之一。楊廣在皇位時,強制班百姓搞土木工事,喺洛陽起咗大隋宮,又挖咗大運河。

從三國時代嘅吳國到南朝統治下,江南進一步開發,取代咗華北平原,作爲穀倉地帶而地位上升,隋朝南北統一,建設咗大運河,確立咗政權喺華北、生產力喺江南嘅形態,而洛陽係個集積地,連結咗江南嘅物資同長安嘅軍事、政治。唐朝統一中國,洛陽作爲繁榮嘅東都,成爲僅次於長安嘅大都市,雖然呢陣時洛陽嘅政治城市機能衰退咗,但通過黃河,佢嘅經濟城市機能冇變到,曾經係啲首富集中居住嘅都市。

但係隨住唐王朝衰退、滅亡,渭水流域嘅軍事政治地位凋落,一系列戰亂令洛陽開始式微。喺宋朝之前,907年後梁皇帝太祖朱温定洛陽做京都,叫做西都,直到913年後梁末帝初頭都係後梁嘅京都。923年後唐掌權,佢又做咗後唐嘅京都,叫做東都。936年後晉改佢名做西京,定都呢度一年。

之後東方嘅開封取代咗洛陽嘅地位,成爲江南生產力移送去華北嘅新集積地,個經濟格局變咗。因爲噉,經歷過五代十國時代而建國嘅宋朝就定開封爲首都,然後元代以降,政治中心轉移去北京,因爲北京有面臨蒙古高原東部騎馬軍事力嘅背景,而長江邊嘅大都市南京集積住江南嘅財富,呢個南北形態確立咗後,洛陽歷史上嘅首都機能就喪失咗。於是作爲中國本土中心地嘅重要性變得低下,但作爲河南地方嘅主要都市嘅地位持續到而家。

洛陽響時期為河南府中文河南府治,民國時期設有專員公署,設置洛陽專區,並一度為民國行都。1948年置洛陽市,但為縣級市,屬洛陽地區管轄,1954年、1964年兩次升為地級市(省轄市)。而今洛陽係個繁榮嘅都市,日頭同其他城市冇咩唔同,而夜晚亦有啲燈光景緻。特別喺市中心週邊、副中心週邊有好多霓虹燈,顯得街景華麗。而家洛陽係個電氣耗能大嘅城市[8],所以喺度努力節約電力使用[9]

地理同氣候

洛陽位於河南省西部、黃河嘅中游。東面係鄭州,東南係平頂山,南面係南陽,西面係三門峽,北面係濟源,東北接住焦作

總面積1萬5230平方公里[3],市區面積803平方公里[3]。地形上山地佔45.51%,丘陵佔40.73%,平原佔13.8%[10]。黃河、洛河伊河中文伊河澗河中文澗河瀍河流過佢嘅領域內。東面係虎牢關,西面係函谷關,北面係邙山中文邙山,南面係伏牛山中文伏牛山。同時佢鄰接中嶽嵩山。所以呢度自古係兵家必爭之地,亦係歷代帝王考慮建都嘅土地。

洛陽市嘅氣候屬大陸性氣候。特徵係四季分明,冬季寒冷而降水少,春季乾燥而風多,夏季暑氣非常之重,雨水多而集中。秋季晴朗,日照時間長。年平均氣溫14.7℃,年平均降水量599.5毫米。

洛陽市(平均數據1971-2000年,極端數據1951-2000年)氣候平均數據
月份 1月 2月 3月 4月 5月 6月 7月 8月 9月 10月 11月 12月 全年
歷史最高温 °C(°F) 22.2
(72)
24.3
(75.7)
31.2
(88.2)
35.5
(95.9)
40.6
(105.1)
44.2
(111.6)
41.9
(107.4)
41.7
(107.1)
38.2
(100.8)
34.8
(94.6)
27.0
(80.6)
23.5
(74.3)
44.2
(111.6)
每日平均氣温 °C(°F) 0.8
(33.4)
2.9
(37.2)
8.6
(47.5)
15.9
(60.6)
21.3
(70.3)
26.0
(78.8)
27.0
(80.6)
25.9
(78.6)
21.1
(70)
15.4
(59.7)
8.6
(47.5)
2.6
(36.7)
14.7
(58.5)
歷史最低温 °C(°F) −17.4
(0.7)
−18.2
(−0.8)
−9.1
(15.6)
−3.6
(25.5)
4.4
(39.9)
12.2
(54)
16.5
(61.7)
13.5
(56.3)
6.9
(44.4)
−2.3
(27.9)
−8.6
(16.5)
−14.9
(5.2)
−18.2
(−0.8)
平均降水量 mm(英寸) 9.0
(0.354)
15.9
(0.626)
26.4
(1.039)
36.9
(1.453)
50.2
(1.976)
62.9
(2.476)
140.2
(5.52)
97.4
(3.835)
84.1
(3.311)
45.2
(1.78)
19.5
(0.768)
11.8
(0.465)
599.5
(23.603)
平均降水日數(≥ 0.1mm) 3.5 5.1 6.2 7.0 6.9 8.0 12.2 10.7 9.4 7.8 5.0 3.4 85.2
出處 #1:中國氣象局公共氣象服務中心
出處 #2:人地系統主題數據庫

人口

2017年尾洛陽總人口682萬[4],市區人口201萬幾[4]

洛陽市有各樣民族雜居,呢個數合埋有45個民族[5]。當中漢族有674萬人[11],佔成個市人口嘅98.8%[5]。其他少數民族近8.1萬人[11],佔咗市人口嘅1.2%[5]。少數民族以回族為主,近6萬人,佔少數民族人口80%以上[5]。超過千人嘅少數民族有回族、滿洲族蒙古族[5]

文化

 
白馬寺,中國最早嘅佛教寺廟

龍門石窟自2000年11月起列入UNESCO世界遺產名錄。白馬寺喺今日舊城東面21公里處。關林係紀念三國英雄關羽而建造嘅一系列廟宇,離城南嘅石窟幾近。洛陽古墓博物館喺城北,係中國最大嘅陵墓博物館。洛陽博物館中文洛陽博物館位於市中心。

洛陽亦有名在於佢係各類牡丹嘅培育中心。牡丹花亦係呢座城市嘅花類表徵。

政區

洛陽市管六區八縣一縣級市,分別係:

洛陽地圖

轄下變動年表

洛陽專區(1949年—1954年)

  • 1949年10月1號,中華人民共和國河南省洛陽專區成立,有洛陽市、洛陽縣、偃師縣、孟津縣、新安縣、宜陽縣、伊陽縣、伊川縣、嵩縣(1市8縣)
  • 1952年4月8號,陝州專區嘅陝縣、澠池縣、洛寧縣、盧氏縣、欒川縣、靈寶縣、閿鄉縣編入(1市15縣)
  • 1954年4月19號,洛陽市由縣級昇爲地級(15縣)

洛陽市、洛陽專區(1954年—1958年)

  • 1954年4月19號,洛陽市昇爲地級市,脫離洛陽專區,成立一區、二區、郊區(市3區,專區15縣)
    • 6月21號,閿鄉併入靈寶(市3區,專區14縣)
    • 9月4號,許昌專區嘅臨汝縣編入(市3區,專區15縣)
  • 1955年3月4號,洛陽縣一部分畀咗洛陽市嘅郊區(市3區,專區15縣)
    • 11月7號,洛陽縣解體,分入孟津、偃師、宜陽(市3區,專區14縣)
    • 12月,一區同二區合併,成老城區(市2區,專區14縣)
  • 1956年3月17號,郊區分出部分成立澗西區,老城分出部分成立西工區(市4區,專區14縣)
    • 6月30號,孟津畀咗一部分入洛陽市嘅郊區(市4區,專區14縣)
  • 1957年3月26號,陝縣分出一部分,成立地級市三門峽市(市4區,專區14縣)
  • 1958年12月8號,洛陽市、三門峽市編入洛陽專區,洛陽同三門峽由地級市降爲縣級市(專區2市14縣)

洛陽專區(1958年—1964年)

  • 1958年12月8號,洛陽市、三門峽市編入洛陽專區,洛陽同三門峽由地級市降爲縣級市(2市14縣)
  • 1959年8月21號,伊陽改名做汝陽(2市14縣)
    • 10月1號,陝縣併入三門峽市(2市13縣)
  • 1960年8月15號,欒川併入嵩縣(2市12縣)
  • 1961年10月5號,欒川從嵩縣度恢復返(2市13縣)
  • 1962年3月27號,陝縣從三門峽度恢復返(2市14縣)
  • 1964年4月30號,洛陽市恢復爲地級市(1市14縣)

洛陽市、洛陽專區(1964年—1969年)

  • 1964年4月30號,洛陽市恢復爲地級市,設澗西區、洛北區、瀍河回族區、郊區(市4區,專區1市14縣)
  • 1969年3月15號,洛陽專區改名做洛陽地區(市4區,地區1市14縣)

洛陽市、洛陽地區(1969年—1986年)

  • 1970年1月27號,澠池分出部分,成立義馬礦區(市4區,地區1市14縣1礦區)
  • 1971年11月8號,孟津由地區畀入市(市4區1縣,地區1市13縣1礦區)
  • 1975年12月20號,洛北分出一部分,成立西工區(市5區1縣,地區1市13縣1礦區)
  • 1976年11月12號,洛陽市畀返孟津入地區(市5區,地區1市14縣1礦區)
  • 1981年4月4號,義馬礦區昇爲縣級市義馬市(市5區,地區2市14縣)
  • 1982年1月30號,洛北改名做老城區(市5區,地區2市14縣)
    • 8月13號,新鄉地區嘅孟縣、濟源縣各分出一部,合成吉利區(市6區,地區2市14縣)
  • 1983年9月1號,地區畀咗新安、偃師、孟津入市(市6區3縣,地區2市11縣)
  • 1986年1月18號,洛陽地區解體,三門峽市恢復爲地級市;義馬、澠池、陝縣、靈寶、盧氏畀咗三門峽市;欒川、嵩縣、汝陽、宜陽、伊川、洛寧畀咗洛陽市;臨汝畀咗平頂山市(市6區9縣)

洛陽市(1986年至今)

  • 1993年12月15號,偃師由縣昇縣級市,做偃師市(6區1市8縣)
  • 2000年5月20號,郊區同西工區各出一部,合成洛龍區,郊區淨低部分分割入澗西、西工、老城、瀍河(6區1市8縣)
  • 2006年6月,宜陽畀咗部分入洛龍(6區1市8縣)
  • 2007年5月,西工畀咗部分入澗西(6區1市8縣)
  • 2008年5月,伊川畀咗部分入洛龍(6區1市8縣)
  • 2009年12月21號,偃師畀咗部分入洛龍(6區1市8縣)
  • 2010年3月19號,偃師畀咗部分入洛龍(6區1市8縣)
  • 2011年5月9號,偃師畀咗部分入洛龍(6區1市8縣)
  • 2013年2月22號,宜陽畀咗部分入洛龍(6區1市8縣)

教育

旅遊景點

  • 偃師商代都城遺址
  • 東周皇城遺址
  • 白馬寺,位於洛陽舊城東方21公里,係佛教傳來中國時最初起嘅寺。人稱釋源、祖庭
  • 龍門石窟,位於洛陽市南方14公里,喺龍門山西山,名列中國三大石刻之一,係個藝術寶庫,列入世界遺產
  • 漢魏洛陽城遺蹟
  • 隋唐洛陽城遺蹟
  • 關林廟,三國蜀國大將關羽嘅頭埋葬嘅地方
  • 白園,喺龍門山東山,唐代詩人白居易嘅墓
  • 古墓博物館,中國最早嘅地下式古墓博物館
  • 洛陽博物館,九朝古都洛陽嘅歷史博物館
  • 洛陽牡丹,海外知名,每年4月開嘅牡丹花會係中國四大名會之一,有好多人來睇
  • 含嘉倉
  • 天津橋
  • 邙山
  • 白雲山
  • 櫻桃溝
  • 花果山
  • 鷄冠洞
  • 小浪底大壩

交通

友好城市

洛陽同其他好多國家嘅都市結成咗友好嘅關係。

  1. "歷史沿革". 中國洛陽. 喺2017年5月15號搵到. 
  2. 2.0 2.1 "基本概況". 洛陽市政府. 喺2019年2月21號搵到. 
  3. 3.0 3.1 3.2 "洛陽市情概況". 洛陽市統計局. 2015年6月3號. (原先內容喺2016年11月17號歸檔). 喺2017年5月14號搵到. 
  4. 4.0 4.1 4.2 4.3 4.4 4.5 4.6 "洛陽市2017年國民經濟和社會發展統計公報". 洛陽市政府. 2018年3月22號. 喺2019年2月21號搵到. 
  5. 5.0 5.1 5.2 5.3 5.4 5.5 "區劃人口". 中國洛陽. 喺2017年5月15號搵到. 
  6. "洛陽市花". 中國洛陽. 喺2017年5月15號搵到. 
  7. 後漢書》〈第九卷〉:初平元年[...]三月[...]己酉,董卓焚洛陽宮廟及人家。
  8. "下半年洛陽市節能降耗前景不容樂觀". 河南省政府. 2011年8月24號. 喺2017年11月29號搵到. 
  9. "洛陽照明燈飾告別高耗能 年減排二氧化碳3000餘噸". 阿拉丁新聞. 2010年8月10號. 喺2017年11月29號搵到. 
  10. "自然地理". 中國洛陽. 喺2017年12月11號搵到. 
  11. 11.0 11.1 用2017年總人口數據計百分比。

出面網頁