黃巾之亂

黃巾之亂，又叫黃巾大起義，係東漢末年嘅一場農民起義，喺184年爆發。發生呢次農民起義嘅原因係東漢嘅朝廷統治腐朽（黨錮之禍、漢靈帝賣官鬻爵），太平道嘅創建同埋傳播。

黃巾之亂
日期： 184年 地點： 中國各地，以豫州及青州同埋徐州最嚴重 結果： 張角病逝，黃巾軍逐漸被官兵擊敗
參戰方
太平道	東漢
指揮官同領導者
張角† 張寶† 張梁†	東漢各地英雄
兵力
約500,000人	100,000-120,000人
傷亡同損失
約300,000人	70,000人

時序

巨鹿人張角用符水幫人醫病，有好多人信佢，張角又收埋弟子叫佢哋去其他地方招攬信眾，經過咗十幾年，有成幾十萬信眾，遍佈青、徐、幽、冀、荊、揚、兗、豫八個州。

張角見到時機成熟，於是設置36個「方」，即係好似將軍咁，大嘅方有成萬幾人，小嘅方都有成六七千人。張角班人又話：「蒼天已死，黃天當立，歲在甲子，天下大吉。」（184年係甲子年。）張角手下馬元義等人喺荊、揚兩州收集咗幾萬人，叫佢哋去鄴會合，馬元義又喺京城洛陽搵到一啲宦官做內應，約定喺184年三月五日起事。

184年春天，張角弟子唐周向官府告密，話張角班人想作反，之後官府喺洛陽拉咗馬元義同處死佢。朝廷開始對信奉張角嘅人郁手，誅殺咗千幾人，又叫冀州官府拉張角等人。張角等人知道件事已經穿煲，於是拿拿臨叫各地嘅人起事，佢哋戴黃巾做記認，所以當時嘅人叫佢哋做「黃巾賊」。

184年二月，張角自稱天公將軍，張角細佬張寶稱地公將軍，張寶細佬張梁稱人公將軍，喺地方作反，好多地方響應佢哋。

184年三月，朝廷任命何進做大將軍。

184年五月，左中郎將皇甫嵩同騎都尉曹操同右中郎將朱儁一齊大敗黃巾軍，黃巾軍陣亡幾萬人。六月，南陽黃巾軍首領張曼成陣亡。

184年十月，皇甫嵩嘅官兵喺廣宗大破張梁軍，張梁陣亡，黃巾軍死咗成8萬人。呢個時候張角已經病死咗。十一月，皇甫嵩嘅官兵打敗張寶，張寶陣亡，黃巾軍被殺被俘加埋有成十幾萬人。

黃巾軍張曼成嘅餘黨由趙弘做首領，聚集成十幾萬人，最後畀朱儁打敗。

結果

張角喺事件爆發幾個月就死咗，佢兩個細佬都打唔掂，卒之俾朝廷搞掂。

不過東漢朝廷為咗消滅黃巾軍餘黨，喺188年下放軍權畀州牧，導致日後嘅州牧割據。