黑田清子(日文:黒田 清子くろだ さやこ Kuroda Sayako1969年4月18號—)係日本舊皇族,乳名紀宮上皇明仁美智子嘅細女,依家係鳥類研究人員兼伊勢神宮祭主。響未皇籍脫離之前,尊稱為清子內親王(日文:さやこないしんのう ,坊間又叫紀宮清子內親王),而老公係東京都廳職員黑田慶樹。

2005年,清子內親王以明仁個女嘅身份出席2005年日本世界博覽會

經歷

皇室成員時代

1969年4月18號,清子響東京都千代田區皇居宮內廳醫院出世,係明仁同美智子嘅細女,上有大佬德仁同埋文仁,係早產[1]

 
當時只有十幾歲嘅清子

1973年,清子入讀柿之木坂幼稚園,一年之後轉讀學習院幼稚園。佢先後讀過學習初等科、中等科、高等科,響1988年入讀學習院大學國文系(即依家嘅學習院大學日本文學科)。期間,老豆明仁同阿媽美智子都覺得清子第日好可能會嫁人,所以每年阿媽美智子都會帶清子去旅行。1989年,清子嘅成人禮(成人禮即係代表佢已經係成年人,唔再係細路仔)本身響1月會搞,點知阿爺昭和天皇駕崩,所以成人禮延期到1990年搞。

1992年,清子大學畢業之後,轉到山階鳥類研究所做非常勤研究助手,係第一個可以出去做嘢又攞到人工嘅皇室成員。響1998年,清子正式轉為正式研究員,期間仲響赤坂御用地同埋皇居從事鳥類研究,同埋成日參加平凡社嘅《日本動物大百科》嘅編輯,負責寫「普通翠鳥」一節。另外佢仲好關心導盲犬嘅嘢。

響2003年,經二哥文仁介紹,佢再次見返細個嘅老友、東京都廳職員黑田慶樹。響第二年1月,慶樹同清子求婚,清子應承咗,同年2月清子同父母介紹有關慶樹嘅野。同年12月,佢地嘅婚事公開。

響2005年,佢哋進行納采之儀(即提婚儀式),同年10月攞到私家車嘅駕駛執照,同年11月響東京都千代田區內幸町帝國飯店搞婚禮,除咗父母同埋兩個大佬之外,仲有一啲以前畀人皇籍脫離嘅前皇室成員都有出席(就好似四姑姐池田厚子),總共有120人出席[2]

皇籍脫離之後

響結婚當日,區長批准佢哋嘅婚事,自此清子唔再係皇室成員,成為平民,戶籍名都由清子改叫黑田清子。結婚之後,清子同皇室依然有密切交流。響2006年,清子同慶樹搬入新買嘅私人樓[3]

響2012年,清子就任伊勢神宮臨時祭主,響伊勢神宮當時祭主、四姑姐池田厚子嘅幫助底下,舉行咗唔少重大儀式,就好似第62次神宮式年遷宮[4]。2017年,池田厚子辭任伊勢神宮祭主一職,交由清子接任[4]

屋企

老豆:明仁

阿媽:美智子

兄弟姐妹:大佬德仁---二哥文仁

老公:黑田慶樹

  1. "Official duties at the new palace / Attendance at a Gakushuin Primary..." Getty Images (英文). 喺2020-08-25搵到.
  2. "人民网--404页面". www.people.cn. 原著喺2020-08-24歸檔. 喺2020-08-25搵到.
  3. "日本纪宫公主今日大婚[组图]". web.archive.org. 2012-09-24. 喺2020-08-25搵到.
  4. 4.0 4.1 "伊勢神宮祭主に黒田清子さん 天皇陛下の長女 - 共同通信 47NEWS". web.archive.org. 2017-06-20. 喺2020-08-25搵到.