龍蝦灣石刻係香港史前時期嘅石刻，喺新界西貢區清水灣半島龍蝦灣，喺1983年被評為香港法定古蹟。
龍蝦灣石刻喺1978年俾一班遠足人士發現。石刻喺一塊向東嘅岩石面上面，圖紋呈飄忽嘅幾何形狀，有部份現出鳥獸同眼睛嘅圖案。因為久經風化，圖紋已極之模糊。
然而，有啲學者認為呢啲圖紋純粹只係天然侵蝕所做成，爭論到而家都未完。
