西貢區

西貢區係香港其中一個地方行政區，位於新界東部沿海，總面積12,680公頃，係香港面積第二大嘅區。由於呢個區好多地方都冇開發，西貢被譽為香港嘅後花園。

西貢區

西貢區嘅範圍包括西貢半島南部、清水灣半島、將軍澳新市鎮以及東面水域嘅七十幾個島。喺2006年西貢區人口有406,442人，絕大部分都住喺將軍澳新市鎮。

地理

西貢公眾碼頭

西貢區喺地理上可分為「西貢及西貢鄉郊」同埋「將軍澳及清水灣半島」兩部份。

• 「西貢及西貢鄉郊」包括西貢市、白沙灣、波羅輋、井欄樹、壁屋、大網仔、北潭涌、蠔涌、萬宜水庫等地。
• 「將軍澳及清水灣半島」包括大埔仔、將軍澳、坑口、調景嶺、茅湖仔、清水灣、布袋澳、大赤沙、小赤沙等地。

由於歷史分區嘅原因，位於半島上嘅西貢北地區（包括北潭坳、黃石碼頭、海下灣、以及位於西沙路沿線嘅十四鄉、泥涌等地），係由大埔區管。