龐淯

龐淯（淯讀玉，粵拼：pong4 juk6；？—？），字子異（zi2 ji6），酒泉表氏人，係東漢末年、三國初年曹操呢派軍閥嘅官員。

龐淯
曹魏 官員
遞啲名
字	子異

生平同事蹟

龐淯阿媽係龐娥親，喺嗰時係有名嘅烈女。

初頭龐淯做涼州從事，擔任職務係破羌長（破羌縣屬涼州金城郡）。當時武威太守張猛造反，殺咗涼州刺史邯鄲商，落令話邊個敢去弔喪邯鄲商，佢就殺邊個。龐淯聽咗之後，放棄官職，日夜趕程，去到邯鄲商被害嘅地方哭喪；然後收埋匕首喺身去搵張猛，諗住見到就殺佢。張猛睇龐淯係義士，落令唔準害佢，於是龐淯忠烈嘅名聲揚咗開去。

之後，酒泉太守徐揖請龐淯做主簿。嗰陣時啲強豪作亂，佢哋慣開隱瞞地頭上戶籍嘅壯丁數，以此漏稅來對抗政權。徐揖猛烈鎮壓郡中嘅黃氏強豪，不過黃家嘅一個成員黃昂因爲喺遞處而逃脫甩，集合咗過千人包圍郡城。龐淯離開咗老婆仔女，趁夜跳出城去外，去張掖、敦煌呢兩個郡求援兵。開頭呢兩個郡懷疑強豪件事，以呢個理由推託唔出兵。龐淯諗住自殺畀佢哋睇，於是感動到佢哋，應承出軍救助，但嗰陣酒泉郡城已經破咗，徐揖亦都被害。龐淯幫徐揖收屍，送返去鄉下，爲佢守三年喪。曹操聽到呢啲事，召佢做掾屬。

曹丕稱帝後，拜龐淯做駙馬都尉，然後升做西海太守，又封爵關內侯。之後召佢返來，拜做中散大夫。唔清楚龐淯幾時過身，過身後佢嘅仔龐曾繼承咗爵位。

參攷資料

• 陳壽（著）；裴松之（注）。〈卷十八 - 魏書：二李臧文呂許典二龐閻傳 - 龐淯傳〉. 《《[[三國志]]》》。