2005年香港高級程度會考中國語文及文化科爭議
2005年香港高級程度會考中國語文及文化科爭議係指2005年香港高級程度會考（下稱高考）中國語文及文化科（下稱中化科）一系列嘅爭議，當中以閱讀理解部份嘅攪切榨爭議最多人曉。
爭議 編輯
閱讀理解 編輯
2005年4月8號舉行嘅高考中化科卷一乙部閱讀理解，試卷臨時改變考核方式，由過往考速讀改做精讀，問題形式由填充題同埋多項選擇題改做考問答題，篇章由六篇短篇改做三篇長篇，影響考生表現，引起多名考生向香港考試及評核局（下稱考評局）投訴。
試卷嘅問題，俾考生批評太過難，當中以對「攪切榨」最多人曉。閱讀理解嘅其中一個篇章以香港文學家董橋嘅《中年是下午茶》做閱讀理解嘅選材，其中一條問題問到文章入面「攪一杯往事，切一塊鄉愁，榨幾滴希望」之中，「攪」「切」「榨」三字喺文中嘅意思，皆因問題太深而引起普遍考生嘅不滿。
聆聽 編輯
而2005年4月9號舉行嘅高考中化科卷三聆聽理解，處境係一班醫生討論歷史人物。其中一名黃先生讀到王莽、希特拉同周公，指頭兩個人係「煽惑者」，「煽惑者」指嘅係「有人喺公共事務上，先盡量討好民眾，利用佢情緒煽風點火、蒙蔽歪曲，攻擊同自己唔同意見，以達到個人目標」。結果俾外界指責「政治洗腦」。香港教育專業人員協會前會長司徒華批評考評局已經有預設立場，反問好多嘢都同生活有關，做乜一定要講政治。
考評局回應 編輯
香港考試及評核局學科部副總監黃兆生回應香港傳媒，否認閱讀理解試卷更改考核模式，指局方從未硬性定明試卷應考篇章數目，亦冇規定唔能夠以問答題方式評核，故「並不存在任何不公平」。佢又指出，試題係由香港大專院校同中學有關學科嘅教師擬寫同審題，已確保試題嘅程度適合中七學生回答。
而針對聆聽試卷「政治洗腦」嘅指責，黃兆生指試卷只要求考生判斷聆聽內容有冇談及某啲題目，並非要求考生就題目作價值觀判斷或表達個人政治觀念，因此冇洗腦嘅問題。
參攷 編輯
- 〈考評局否認「政治洗腦」〉，2005-04-12，《蘋果日報》
- 〈高考中文科被投訴不公〉，2005-04-12，《太陽報》
- 〈高考生投訴改評核方式〉，2005-04-12，《東方日報》
- 〈高考試題 被抨「政治洗腦」〉，2005-04-12 ，《香港經濟日報》
- 〈高考生改歌詞諷考評局〉，2005-04-19，《明報》
（部份內容取自中文維基百科2005年攪切榨嘅被刪版本）