2010年冬季奧林匹克運動會
(由2010年溫哥華冬季奧運會跳轉過嚟)
2010年冬季奧林匹克運動會係第21屆冬季奧林匹克運動會，2010年2月12號到2月28號喺加拿大溫哥華搞，而部分項目就喺鄰近嘅威士拿舉行。
呢屆奧運會，係繼1976年夏季奧林匹克運動會同埋1988年冬季奧林匹克運動會後，加拿大第三次搞嘅奧運會，亦係卑詩省頭一次搞嘅奧運會，由史提芬·拿殊、卡翠奧娜莉美杜安、蘭茜格蓮、韋恩·格雷斯基負責點燃奧運聖火。
最終，東道主加拿大憑住冰球、冰壺、長雪橇等項目扒過挪威頭，以14金7銀5銅完成賽事，除咗成功登上獎牌榜首位外，亦做咗歷屆冬季奧運會中成績最好嘅東道主，德國同美國分別排第二、第三。
加拿大同時亦係歷屆冬季奧運會入面，單屆贏得最多金牌嘅國家（呢個紀錄之後喺2022年北京冬奧會，畀挪威打破咗），打破咗前蘇聯喺1976年燕斯布陸冬奧會創下嘅13金同埋挪威喺2002年鹽湖城冬奧會同樣創下嘅13金紀錄，亦一掃1976年滿地可奧運會同埋1988年卡加利冬奧會作為東道主但冇一面金牌落袋嘅窘境。
