2021年香港立法會選舉民主黨初選

2021年香港立法會選舉民主黨初選，係指民主黨就第7屆香港立法會選舉所進行嘅第二次黨內程序。

呢次黨內選舉，最終只有韓東方一人參選，不過佢無辦法攞到足夠黨內提名，而選擇放棄。選舉最後都搞唔成。

背景編輯

第7屆香港立法會選舉本來應該喺2020年9月進行，民主黨本來喺2020年6月嗰陣進行過黨內初選，然後7名現任立法會議員都得到黨內推薦參與跟住進行嘅泛民主派初選。不過，喺原定正式選舉提名期之後，政府以武漢肺炎疫情為理由，將選舉延期，之後北京更加未經香港人同意或者事先諮詢，就大幅度削減立法會直選議席數目同比例，同時設立唔畀上訴嘅單方面政治審查制度。之後，香港政府更加以香港國家安全法為理由，進行針對2020年香港民主派初選嘅檢控同拘捕，被形容係「港版美麗島事件」^[1]。

包括民主黨在內，泛民主派唔少代表人物明言杯葛，但香港政府同親中派有一啲聲音話唔係想搞「清一色」^[2]，認為屬於溫和民主派，例如民主黨可以被接受，中華全國歸國華僑聯合會副主席盧文端（吳永嘉外父）又恐嚇民主黨，話民主黨如果全面禁止成員參選，只有「死路」一條^[3]。呢啲帶有威嚇性嘅言論亦引起一啲其他人嘅批評，例如泛民主派學者梁啟智就公開質疑，呢種迫人參選嘅做法，違反香港法例第554章第8條^[4]。

另一方面，民主黨黨內亦有一啲聲音認為應該繼續參選，黨內出現咗分歧。其中，被視為「參選派」嘅有副主席梁翊婷、中委蘇逸恒、區議員曾自鳴、前立法會議員鄺俊宇、李華明等^[5]。

民主黨最後仍然設立黨內參選甄選機制。