阿迪達斯

  提示：呢篇文講嘅唔係阿迪王、阿迪達或狄易達。

阿迪達斯（Adidas，粵語地區簡稱/ɛt̚˥ ti˩˥/）係德國一個運動用品牌子，生產包括運動鞋同運動衫褲在內嘅一系列運動用品，總部位於德國赫茨歐拉（Herziaura）。目前，阿迪達斯係全球第二大運動衫褲生產商，僅次於Nike。

阿迪達斯商標

德國赫茨歐拉嘅阿迪達斯總部同總廠

加拿大旺市一間阿迪達斯商店

2012年，阿迪達斯全年總收入達到148.8億歐元。

歷史

阿迪達斯嘅前身係由魯道夫·達斯勒（Rudolf Dassler）同阿道夫·達斯勒（Adolf Dassler）共同建立嘅「達斯勒兄弟鞋廠」（Gebrüder Dassler Schuhfabrik）。1936年柏林奧運會期間，達斯勒兄弟力排眾議，向美國黑人運動員謝斯·奧雲斯提供鞋釘。結果奧雲斯連奪四面奧運金牌，達斯勒兄弟鞋廠亦都一炮而紅。

但係後來嘅一場誤會引發徂兄弟兩人嘅不和：1943年，有一次魯道夫一家人為徂躲避盟軍空襲而匿徂入去阿道夫一家嘅防空洞裡面，阿道夫唔知係有心定無意恁講徂句：「嗰班臭雜種又返來嘞。」雖然阿道夫後來解釋「臭雜種」指嘅係盟軍嘅飛機，但係魯道夫堅持認為「臭雜種」係指佢自己一家人。後來魯道夫被美軍俘獲，而今次被俘令到魯道夫更加相信係阿道夫向美軍出賣徂自己。

二戰結束之後，達斯勒兄弟鞋廠復業，有47名員工，重用帆布同美軍燃油槽提煉出合成橡膠，製成戰後第一款運動鞋。但係兩兄弟嘅不和最終導致兩人喺1948年分道揚鑣：阿道夫退出徂達斯勒兄弟鞋廠，另外建立徂阿迪達斯爾個品牌——阿迪達斯爾個名來自「阿道夫」嘅愛稱「阿迪」同埋「達斯勒」嘅頭一個音節；而魯道夫就喺歐拉河對岸建立徂自己嘅新品牌PUMA。於是兩個品牌好快成為徂死對頭，而兩兄弟據聞亦都從此再唔往來，甚至到過徂身之後都唔肯葬喺對方身邊。直到今日，阿迪達斯同PUMA兩個品牌嘅總部都重喺赫茨歐拉。

2009年，阿迪達斯同PUMA兩間公司嘅員工喺赫茨歐拉舉行徂一場足球友誼賽，為兩兄弟長達60年嘅不和象徵性恁劃上徂句號。