Among Us
《Among Us》（粵譯：喺我哋之間）由美國遊戲開發者 InnerSloth 整嘅一隻網上多人電子遊戲，2018 年 6 月 15 號推出。
玩法
編輯《Among Us》係一隻多人推理遊戲（Multiplayer reasoning game）：每一場對局會有大約 4 至 15 個玩家玩，當中有 1 至 3 位扮演「冒名者」（impostor），而其餘嘅就扮演一架太空船嘅船員（Crewmate），冒名者有分普通冒名者同變形者，變形者可以變形扮其他仲喺場遊戲入面嘅玩家，而其他人唔知道佢哋嘅身份係乜，佢哋嘅目的係要暗中殺死所有船員，而船員又有分普通船員、工程師同科學家，工程師可以好似冒名者咁入通風口；而科學家可以隨時睇生命監測器，不過有限時，一旦用哂電就要做任務去叉電繼續用；而佢哋嘅目的係要完成佢哋手上嘅工作，工作會以小遊戲嘅形式完成（維修太空船上嘅設備、清理太空船上嘅垃圾等等），冒名者有能力殺死身邊嘅船員、喺通風口中移動、同埋搞破壞（例如係熄咗船上嘅燈佢），而船員就有能力喺發現同伴屍體或者睇到可疑嘅嘢（例如見到其中一名「船員」走咗入去通風口）嗰陣，要求開會以及喺開會嗰時投票決定係咪要將其中一個船員殺死（順利嘅話，佢哋想殺嗰位「船員」正正係冒名者）。
如果冒名者成功殺死船員，殺到船員數量等如冒名者嘅數量或者搞會死人嘅破壞（例如耗盡氧氣、令反應爐熔毀等等）並且成功咗嘅話，噉就算係冒名者贏，而如果船員成功投出所有冒名者或者成功做晒所有任務，就係船員贏[1]。
如果玩家俾人殺咗或者被投票驅逐，佢就會變成幽靈或守護天使（只限船員）。船員幽靈仍然可以繼續做任務嚟取得勝利；冒名者幽靈雖然唔可以殺人，但仍然可以搞破壞；而守護天使就可以喺冒名者準備殺船員嗰陣保護船員，令佢唔使死。
喺遊戲當中，玩家可以揀太空衣嘅顏色、帽、服裝同埋寵物。太空衣顏色就視乎位玩家進入遊戲後，如果隻色一早已經俾人揀咗嘅話，就只可以隨機分配剩返嘅顏色。帽就唔受限制。遊戲有啲嘢係需要畀錢，例如寵物。
玩家亦可以自己創立房間。如果玩家揀公開，其他人都可以自由出入玩家間房，玩家亦可以設立私人房或者喺封面撳「Local」本地選項嚟建立遊戲，畀使用同一Wi-Fi嘅人嚟比賽（通常都係一家大細或者同朋友一齊玩）。
呢隻遊戲目前有四款已推出地圖同埋一張未推出地圖，分別係太空飛船（The Skeld）、大樓（Mira HQ）、星球基地（Polus）同埋飛艇（The airship）。除此之外，仲有將會喺2021年7月推出嘅潛水艇（Submarine）。
睇埋
編輯參考
編輯- ↑ Rodriguez, Salvador (October 14, 2020), "How Amazon's Twitch turned an obscure game called Among Us into a pandemic mega-hit", CNBC.