陳腔濫調

陳腔濫調（法文：cliché，類似粵拼：clit6 shei1）係指一啲橋段或者藝術表現方式因為俾人用得多得滯，而搞到喪失咗原本意義或者原本想達到嘅效果。

「喂，情節又係講王子救返公主然後兩人結婚大團圓結局？噉嘅故仔我聽過 N 咁多次喇喎。」

概論

例如係「係管家做嘅」呢條橋噉：

「

『係管家做嘅』係廿世紀嘅英文偵探故仔當中不時出現嘅橋段，指『故仔所講述嘅嗰一單罪案，最後發現個管家係犯人』。

」

一般認為，呢條橋喺廿一世紀嘅西方偵探文學界經已係一條陳腔濫調，如果一個偵探故仔用呢條橋，好少可會令讀者感到驚訝（意圖嘅效果），而係會令佢哋覺得個故仔老土冇新意。喺創意寫作嘅世界，一條橋係咪陳腔濫調唔係固定嘅，而且有陣時有少少主觀：橋段好多時會隨時間而變成陳腔濫調，但跟住由一啲出色嘅作家做某啲創新，例如係解構或者重構等嘅用法，然後變返做受人接納嘅橋。

起因

一般認為，一條橋會變成陳腔濫調嘅常見原因有以下呢啲：

• 俾人用得多得滯。
• 用嗰條橋嘅某件作品取得巨大成功，引致好多人抄佢，最後令到條橋喺俗作入面出現太多。
• 條橋俾人發覺佢查實根本唔合理，例如一見鍾情俾人用唔少，但好多人發覺，現實世界根本冇咁多一見鍾情。

... 等等。

睇埋

• 創意
• 創新
• 最佳差異